- Lallunghnema, Charity Lodge
Khatia kan Veng leh Vengthlangin Pu Sakiauva Bel inchuh a,Hockey final an khelh dawn ni khan en ve ngei ka duh avangin zingkarah Changpui ram Chhek ina kan buh chu ka phur ve a.Ka thawh tlai a hlauh avangin ka nu chuan mu hma turin min ti a.Kei pawh chu hma takah ka mu ve mai bawk a.Zing khaw var tirhtein ka nu chuan min kai tho a.”Mate,tho rawh,buh phur tur chuan in siam rawh u,Sanga nen khan,in bahra ei tur pawh nizanah ka rawhsak che u a,lungthuah ka tun kha,”tiin ka nu chuan min kai thova.Mut kham lo takin ka tho chhuak ve nghal mai a,ka mit ka nuai chawt chawt a.Zana ka nu’n bahra min rawhsak chu kan unau chuan kan kheh mawlh mawlh a.Kawlbahra chu kan ei zawh chuan tui sik kan tlak pawp a.Buh phur tur chuan kan kal ta a.
Thlasik lai a ni bawk a,a vawt ngei mai!Khankawn kan thlen chuan khua a lo eng tan tawh a,phula vur tla pe un mai pawh chu a hmuh theih riai riai a ni.Thawm ka hriat avangin ka han leh hawi a,Chalate unau chu an lo lang ve hlawl mai .Tichuan,kan thian zaho chuan Chhekin lam pan chuan kan phe ta hlawk hlawk mai a. Reiloteah Buh in chu kan zu thleng a.Buh chu kan phur tawk te tein kan ,’lawk,’a,haw tur chuan kan insiam leh ta a.Zingkar buh phur kan ni bawk a,riltam hman lutuk lovin dar riat leh a chanve velah khua chu kan lut leh mai a.Ka nu chuan chaw ei a siam sawk sawk a,antam ,a tak al thak leh bawkbawn zo vawk hriak ngeia kan chu kan hmeh a.Thangmual kan neih kuma ka pa fian thlir tuk ngei a,antam tuihang han hawp chu a tui danglam kher mai!
Chaw ei kham chuan inkhel en turin chhim leh hmar atangin mipuiin Mualpui chu an pan nguah nguah mai a.Keini thian zaho pawh chu mual kam A Team a tang turin Mualpui chu phur takin kan pan ve a.Tialawite leikapuiah chuan kan thu ve far hlawm a . Tichuan le,Vengthlang A Team leh kan Veng A Team-te inkhuai nuai tur boruak chuan Saikhawpui a chiah hneh hle a. Kan Veng lam chu Tv Pahnina’an a hova,lehlam Team Captain chu Tv Siamhleia a ni thung a.An intum tawkin an incho tawn hle mai!A tu zawkin nge si phur hmasa ang a , khawi Veng zawkin nge Belpui chu la ang? tih chu kan inrin siak nasa mai a.
Team pahnihte chu an han ‘inthah’ a, Siamhleia leh Pahninate inthah chu pui rep rep tak a ni.Umpire-in pakhat,pahnih ,pathum,a tih hma chuan inchuh awih loh a nia. Mahse,umpirein pathum a tih hmain an inchuh rup rup zel mai!A va buaithlak em!Umpire Tv Sawithanga chuan an khelkawm ve ve chu a han humsak a,hamrik a ham ta thuai mai a.Inkhel an tan ta!Thal jntan hun laia ni bawk a,khel mual pawh chu a khu duh hle mai.An han inchuh tak tak phei chuan vaivut khu avangin ball pawh chu an hmu hlei thei lo a ni ber mai.Mahse,an lo tihthan tawh avangin heng vai vut khu mai maite hi chu eng ualah an ngai tawh lo,a khuk loh chuan an ngaih a tha lo hial zawk thin.Heng hmelna pahnihte hi an innawr tawk hle mai.Hun tawp dawn hnaihah chuan Pemveng Captain Pahnina chuan Vengthlang lamah a khalh goal ta hlauh mai! Ani,ka u Pahnina chu a rawn bai phei ta va va mai!A khup vei lama a knee cap pawh chu a thlawn ta hial a,mipui chu an sahawk a ni ber e.an ri hulh hulh a.Chutah le, an han inthah leh a,tan a na tawh lutuk! Vengthlang lam chuan an Darkhuang nena inzawn chhuakin mualpui kamah chuan kan Pu Aibawi kephah hlaia(an tih fiamthu thin) Darkhuang chu an chum ri ta vut vut mai .Beisei lawk deuh ang ngeiin Vengthlang tan Sangnawna chuan Pemveng lamah a ti goal ve ta!An in hneh tawk!Hun a tawp zui!Khua a tlai tawhin khua a thim tep tawh a ni mai.Penalty chu an han thai a,Vengthlang chu an chak ta zawk a.Sakiauva Bel chu Vengthlangin an la ta a ni.Pemveng an ngui nghuai a,Vengthlang an par a ni.
Nia, Vengthlangho zawng ,Home neitu an ni bawk a,an mual hman thiam zawngte pawh chu a ni mahna,an thiam na rawh e . Mual kiltu an nih bakah Darkhuang kha an chakna tha hrui a ni tlat!Kei phei chu he Darkhuang avang ,’bel te,’ hian ka hem goal loh phah fo! I awih em?
Zan a lo thleng a,Veng hrang hrangah Krismas lawmnain a zui nghal a.Keini thian zaho pawh chu kan Veng zaihona Nu Ngurite inah chuan kan kal ve a.Zan khaw tai rek thlengin kan tel ve a.
Saikhaw val leh lanu leng rualten hlim em em a, Krismas hla an han sa thuai thuai mai chu a va ngaihnawm em! Tv Zasanga leh Tv Lalhliraten zai an hruai a,Tv Lianhrima’n khuang a tum thung a,Tv Zahmunga leh Tv Laldawlaten an lo pui bawk. Pa Tlungchinate, Pu Rochuangate ho kha an lo tenor vawn vawn mai bawk a. Krismas zaikhawmna hmun hrang hrangahte chuan zan hnih zan thum tlaivarin zai an vawr thin kha a ni a. Hlim pawh an hlim thin hle a ni.Saikhaw lanu leh val rual aw mawi tak, inchawih mawi em em chuan zai a tinungin an zai tui em em thin a nih hi! Chutih laiin zo chhang kan tur Nu Nguri Pi thawh chuan zaikhawm ho chu a tiphur leh zual a ni. Hmabak a hlimawm a, phurawm hle zawng a ni! Chu Nu Ngurite in ngeiah chuan zai hruaitu chuan hla a han la a:
“Lalpa kan fak a che,
Kan dam nana piang hi ,
Aw,Lal Isu,i hming zahawm fo rawh se;
Kan tuar ai i tuar,Pathian fa i ni si!
Amah i lo fak ang u,Krista kan Lal,” an han ti a.Hlim avanga hnuk ulh teuh chungin Pathian an chawimawi a, tawp na chang an hre lova, tawp thei pawh an ni lo! Mut chhuakin hmun a chang lova, Nausen Isua lawmin thinlung lung chhiain Pathian an fak ning lo.An kein Jordan lui chu daikai kher lo mahse,an thinlungah chuan Bethlehem nun chuan nasa takin hmun a chang a ni.Khawchhak mifingte angin Thilpek hlan ve lo mahse,an aw an hlan a,an thinlung an hlan a ni.
Khua a var tep tawh tihin ui tak chungin Nu Ngurite in chu kan chhuahsan ta a.Kan in ka thlen chuan ke paw phiang phuangin kan puanpuiah chuan rem leh rem lovin ka inthawlh ve ta mai mai a.
Vengthlangho chu Belpui Trophy latu an ni bawk a, an hlim dan a dang deuh va. Mahse, Bethlehem zun chuan a kal kan bik chuang lova, Pu Dawreate inah chuan an zaikhawm vut vut a. Tv Neihchhungate, Tv Dotawnate, Tv Ngurhnemate chuan an uap hneh hle mai. A tuka ruai tur Sechal lian tak chu zaikhawmna in kawtah chuan an thlung ruau mai bawk a. Pu Dawrea in si chetin Krismas thing ro tha tak mai chu an ‘khawn’ ur mai bawk a. An hmabak chu a kovin a va hlimawm tak em! Vengthlang ho nge nge!!
Masi,chibai vek ule!