Kan hriat tlang lawn tak pakhat chu ‘Love is Blind’ tih hi a ni a, tun tumah pawh nupa tuak khat te chuan a takin an rawn nemnget tlat mai. Social media lamah sawi hat hat an tling. Kum 23 mi hmeichhe pakhat chuan a pu rual, kum 63 mi pasalah a nei.
An inkara love story dangdai tak hi internet-ah a darh chak angreng hle a, Brazilian nupa tuak te hian khawvel an barakhaih a ni deuh ber. Lawmpuitu awm ve bawk mah se, nasa taka troll tu pawh an tam.
Kum 23 mi nursing zirlai Maria Eduarda Dias leh a pasal Nixon Motta te hi intawng thut an ni lem lova, Maria-i’n kum 16 hmel a hmuh phat atang tawha in date in, Tiktok kaltlangin nupaa a insiam thu hi tlang hriatah an puang.
Lawmpuitu ai mahin, sawisel a, tawngkam mawi lo leh hriat nuam lo tak taka umzuitu an tam zawk.
Maria chuan, “Kan inneih thu hi a tha zawng leh lawawm zawnga mite’n an dawnsawn ka lo beisei ve deuh a mite’n love story duhawm takah an pawm te pawh ka ring. Mahse, kan beisei leh tum angin thil a kal lo thung,’ a ti.
NIxon pawhin heti taka chhanletna lawawm loh leh tha lo tak tak an dawn a beisei chhin ngai lova, sum leh pai lam hawi thil pakhatah a awm loh thu hi vawi tam a lo sawichhuah tawh vang ani.
“Mi tam tak chuan pawisa nei viau turah min ngai a, hausa tawntaw ni ngei turah pawh min dah. Ani (Maria) pawh hi mihausa tak pasala neiah te pawh an ngai. Mahse, hei hi a ni reng reng lo. Kum 16 mi lek a nih laia intawng tawh kan ni,” a ti ve bawk.
An inngaihzawn phat atangin boruak a kal fuh lo ve hrim hrim a, mi tam takin tha an tihpui lova, an sawisel. “Kan intawn hnu khan kan inngaina zui a, thian anga iinzui kan ni. Kan innhaw lo chho nghal a ni deuh mai,” tiin a sawi.