China chuan thla 10 chuang hnua ni khata COVID-19 kai an hmuh chhuah thar tam leh ber ni an tawng a. Hei vang hian tual chhung sorkar leh factory neitute chuan February thlaa Lunar New Year lo thleng tura an hnuaia hna thawkte chu an khuaa haw lo tur leh chawlh hmanga zin veivak lo turin an ngen.
Hri hi a darh thar leh tial tial zel avangin thuneitute chuan thlaleha Lunar New Year lo thleng turah pawh mite chu a pawimawh hle a nih loh chuan zin lo turin an ngen.
An kum thar hi Chinese maktaduai telten anmahni khuaa hman duha an zin hun lai a ni thin a, khawpuia hna thawka awm mi maktaduai 280 zet chuan mahni khuaa hawna hun remchanga an ngaih a ni.
Company tam tak chuan an him theih nan kûtpui laia haw lova hna thawk duhte chu an hlawh an tihpunsak dawn thu an puang hlawm a. Tual chhung sorkar pawhin ruahmanna tha zawk a siam rin a ni bawk niin Reuters news agency chuan a sawi.
Province tam tak chuan thingtlang mi hna thawkte chu an hnathawhna hmuna an awm a that thu sawiin, hri inkai darh ai chuan industry leh ni tin mamawh mumal taka a kal theih chu a pawimawh zawk tih an sawi.
Hna thawkte tan hlawh pek belh, lawmman siam, intihhlimna siam leh thil dang dang an tiam bawk.
Covid hi kum 2019 kum tawp dawna Wuhan khawpui atanga a darh tan hnu lawkah khan nikuma Lunar New Year khan a nang zui a, mi tam tak zin vei vak chuan nasa takin a tihdarh phah nia ngaih a ni.
China-ah hian COVID-19 kai hi mi 87,988 an awm tawh a, mi 4,635 an thi tawh a. Nilaini khan thihpui an awm leh a ni.