US chuan Patriot air defence missile chu Ukraine hnenah a pe dawn niin an ram chanchinbute chuan an tar lang hlawm.
President Joe Biden-a pawhin Kyiv an puihna tur hi tun kar chhungin a puang dawn niin an hming tar lan loh thuneituten an sawi bawk.
Ukraine hian a hma pawhin boruak atanga kahna laka invenna tur an mamawh thu hi a lo sawi tawh thin a, Russian-ten nasa taka bei mek zelin civil mite an thah bakah power supply a chhe nasa hle.
Patriot hi US air defence system-ah chuan a changkang ber zinga mi a ni a, Ukraine hnenah pawh hian tam tham an pek a rinawm loh.
Engzat chiah nge Ukraine hman turin an thawn dawn a la hriat loh.
Ralthuam inpek tum nia sawi hi pawm a nih chuan ni reilo te hnuah thawn chhuah nghal mai a ni dawn a, Ukrainian sipaite chuan Grafenwoehr, Germany-a US Army base-ah a hman leh enkawl dan an zir hmasa dawn niin thuneitute chuan an sawi.
Patriot system hian Russian-te kahna a lo kap tha thei dawn niin Kremlin chuan Nilaini khan a sawi.
Ralthuam inpek tumna thawm a awm mek lai hian Ukrainian khawpui, Kyiv chu nasa takin Moscow chuan a kap leh a, hei hi a beihna thar ber a ni.
Moscow hian October thla vel atang khan Ukrainian energy infrastructure a la bitum ngar ngar bawk.
Ukraine hian thla eng emaw zat chhung chu US hnenah hian boruak atanga inkahna laka invenna tur pe turin a lo ngen tawh a ni.
US national security thupuangtu, John Kirby chuan kar hmasa khan Russia leh Iran inkawmngeihna chuan ram venhimna lama an thawhpuite chu chak leh tha zawka thuam ve a tihngaih phah tih a sawi ve bawk.
Patriot hi US-in air defence system a neih zingah chuan a changkang ber nia sawi a ni a. Missile pakhat hi $ maktaduai 3 man zel niin kum 2017 khan Washington Post chanchinbu chuan a lo tang lang tawh.
Kum 1980 chho vela an hman atang khan he system hi ram dang eng emaw zat pawhin an lo leisak tawh a, US-in the Pacific leh Europe-a a thawhpui ramte bakah Saudi Arabia pawhin a hmang mek a ni.
Battery-ah hian missile kah chhuahna, radar, command leh control centre a awm vek a, amah thlawptu tur lirthei a awm bawk a. Ken tel a ngah em avang hian enkawla hmang tur chuan mihring a mamawh tam deuh thung.