Chief Minister Zoramthanga hoa nimina sorkar hotute leh Central YMA hruaitute thukhawm chuan dan loa kuhva rah tawlh ruk leh ruihhlo tawlh ruk do turin task force din an rel.
Ruihhlo leh kuhva chungchang sawihoa thukhawmte chuan Mizoram chhunga kuhva hring chingtute harsatna tawh te, tun hnaia CYMA leh Mizoram Police hmalakna te ngaihthlaka sawiho a ni a, hmalak dan tur hrang hrang an rel a ni.
Mizoram chhunga dan loa kuhva ro leh ruihhlo lutte chu theihtawp chhuaha man vek an rel a, hemi atan hian police-te an indaih tawk loh avangin anmahni pui turin YMA leh NGO member dangte pawh a tul anga sawma thawhho zel ni se an ti.
Chak zawka hmalak theih nan task force tha tak din a, home department atangin mawhphurtu eng emaw zat insiamin, NGO atangin eng emaw zat tel bawk se, a tul a nih chuan department dang atang pawhin telh ni se an ti a ni.
Heng bakah hian dan phal loh thilte Mizorama lak luh veng turin check gate leh duty post a tam thei ang ber siam te, a awm sa bakah a tul angin gate siam belha uluk taka vil te, chutah chuan police leh NGO leh, a tul angin Assam Rifles emaw, BSF emaw pawh thawhhopui thei turin coordination tha tak neia kalpuite an rel.
Central YMA-in ruihhlo do beihpui a thlak mekah a remchan dan ang zelin sorkar pawhin sum a puihte pawh thutkhawmah hian an sawiho a ni.
Thutkhawmah hian Dy. Chief Minister Tawnluia leh home leh sorkar dept dangte atangin leh CYMA hotute an tel a ni.