Aizawl: Health Minister Dr R Lalthangliana chuan National Health Mission hnuaia thawktute harsatnate sukiang turin chak zawka hmalak mek zel a nih thu a sawi.
Nimin khan National Health Mission Employee Union Mizoram (NEUM) General Conference Vawi 2-na chu Vanapa Hall-ah neih a ni a, health minister hian khuallian niin hmanpuiin thu a sawi.
Delhi-ah sorkar laipui dawra a kal apiangin NHM hlawh chungchanga harsatna awm a thlen thin bakah Mizorama Directorate of Health Services leh finance department-ah harsatna sukiang tura a thlen thin thu sawiin, “A hun takah kan hmuh tur ang hmu turin hma kan la zel dawn a ni,” a ti.
Health minister hian NHM hnuaia thawktute harsatna hrang hrang, heng – New Pension Scheme, pay revised, direct funding leh service chungchangte pawh chak zawka hmalak mek zel a nih thu a sawi.
Health department bika hna ruak awm hnawh khah loh chungchang sawiin, “Health minister ka nih hlim, kum 2019 tir khan post ruak a tam tih ka hria a. Ka chhuitir a, hnawh khah loh a lo tam hle mai a. Kan chief minister pawh ka sawipui a, rem min tihpui a, health bikah post ruak 734 hnawh khat turin kan tifel a, budget-ah Rs. nuai 5,000 kan dah nghal. Kan buaipuia hma kan lak mek laiin Covid-19 a lo lang ta si a. Hri leng nghawng vangin kan chhunzawm thei ta lo. Pawi kan ti hle,” tiin, state hrang hrang minister-te inhmuhkhawmnaah pawh Covid-19-in harsatna a siam thu an sawi nasa tih a sawi.
Health minister hian Covid-19 leng karah health department chuan nasa taka hma a lak thu sawiin, sub centre 375 zet chu health & wellness-ah hlan kai ni tawhin, PHC 61 pawh CHC-ah upgrade a nih tawh a, sub-centre zawng zawngte hi tun sorkar kum hmanin health & Wellness-ah hlankai hman an tum thu a sawi bawk.