Aizawl: MNF Adviser Robert Romawia Royte chuan nimin khan Mizo Hnam Runah thu sawiin, ZPM hruaitute hi an maltan pheuh pheuh dawn a, kum tharah a bawr bawrin an lo thung dawn niin a sawi.
ZPM chu hruaitu mumal awm loin an kal tih sawiin Robert Romawia Royte hian, “Mipuiten ZPM-a awm an peih tawh lo a, ZPM-a hotute hi Mizo mipuiten an hriat chian em emte vek an ni a, pawl thar lo din apianga tlar hmasaa awm fo tawh thinte an ni a, ‘Kal phung thar’ an tih fo pawh hi mipuiten an hmu a, anmahniah an beidawng tawh a ni,” a ti.
Robert Romawia Royte hian MNF party chu kum 60 chhung a dinna ngaiah nghet taka ding tawh nia sawiin, “Kan hotute leh kan party-puite pawh pawl an sawn ve lo a, kan party president leh chief minister ni bawk, Pu Zoramthanga chu mi dik leh Pathian tih mi a ni tih mipui ten an hria,” tia sawiin, Zoram dung leh vangah MNF party zawmtu an pung zel niin a sawi.
MNF party hi mipuiten an zawm tam chhan ber chu manifesto an tihhlawhtlin zel vang leh Pathian rinchhan chunga kal an nih vang leh hnam thuthlung kengkawh tlattute an nih vang niin MNF adviser hian a sawi bawk.
Inkhawm hi MNF Vice President Vanlalzawma’n a kaihruai a, mi thar lawm luh atangin H. Malsawma pawhin thu a sawi a ni.