Sports and Youth Services Minister Robert Romawia Royte-in “tunlai khawvel buai tak kara harsatna leh chona hrang hrangte dawngsawnga, mumal taka do theitu tura naupangte chher a pawimawh” a ti.
KD Elementary & HS kum 25-na tlin lawmna tunkar Nilainia a hmanpuinaah he thu hi Sports Minister chuan a sawi a. KD Elementary school silver jubilee souvenir a tlangzarh bawk.
Robert Romawia Royte chuan KD Elementary and HS-in kum 25-na hmel a hmu ta chu a lawmpui thu sawiin, zirtirtute inpekna, Pathian kuta an innghah tlatna te, zirlai nu leh pa te thawhhona leh puihna tha leh zirlaite taihmakna leh thuawihna rah a nih thu a sawi.
KD School tum ber naupangte thiam- na tak tak pea, nunkawng tha sial sak chu ngaihsanawm a tih thu sawiin, Robert Romawia chuan zirlaibu leh note bu te chu zirtirna puitu hmanrua mai chauh an nih thu leh a phena hriatna, thiamna tak tak zirlaite neih tira, mi puiling leh tunlai nun mila khawsathiam, khua leh tui tha ni tura chher chhuah a nih thu a sawi bawk.
KD Elementary and High School hi February ni 5, 1997-a din niin, zirlai 700 chuang awm mekin, zirtirtu leh non-teaching staff-33 an awm mek a ni.
Nilaini vek khan Armed Veng Community Centre-ah Aizawl East-II bialtu MLA, Minister of state Robert Romawia Royte chuan Aizawl East-II area-a MUP member te hnenah Krismas thilpek a sem a. MUP member 1800 te hnena an chhungkuain Krismas thilpek an pechhuak thei chu lawmawm a tih thu a sawi bawk a ni.