December…. Ui ha…Krismas leh Kum-thar a lo thleng leh dawn ta reng mai le. Mi thenkhatin he hun hi hlim leh lawma, chhung kimtea an hman laiin, thenkhat tan erawh he December hi lung tilengtu, awm lo hriat chhuahtirtu leh nunhlui ngaihtirtu mai a lo ni.
Chu’ng mite chuan he hun hi lungleng takin an hmang ve ngei ang. Nunhlui mual liam hnu chu dawn kir lehin, lenrual lungduhte nena hlim laini an suangtuah vawng vawng ngei ang.
He hringnunah hian mitinte hian hun harsa leh buaithlak kan paltlangin; hun hlimawm hriatreng tur kan tawn chang a awm bawk thin. Kan hlimni te hi chelhdin reng theih kan duh theuh a; mahse, hun hi mitkhap khar lek pawh kan timuang khawtlai zo si lo a nih hi. Hmanlai mitena vanglaini chelhdin reng theihna hmun nia an lo hriat, khawvel khawimaw laia awm khiau- “Shang-rila” (The Lost Horizon) te leh Peter Pan-a thawnthua- “Neverland” te kha awm tak tak sela aw… tiin ka ngaihtuah fo thin.
December thla a lo ni a, Krismas leh Kumthar a hnai tawlh tawlh a, khualzin mite mahni khaw lam panin an haw sap sap a. Chutih lai chuan chutianga haw remchang lote, rawn haw remchang lo ngaite emaw, thlafam runa lawi tawh hnu ngaia rum rumte tan zawng he hun hi lunglen hun (Kut pui) a nih ngei a rinawm si a ni.
Nimin ral ta ang chauha mihringin kan hriat, a number-a han chhuta kum tam lo liam tawhhlimni zawngte kha dawn kira hun hmangte an awm ngei ang. A hun leh a ni te lah dang chuang si lo, hlimni erawh chuan vulni leh kir zai reng a rel ve dawn mawlh si lo.
Hringnun lamtluang zawha kan kalna hi ngun taka dawn chang hian, “Lungleng tur reng hian em ni Khuanu hian min lo duan?” tih châng ka nei thin. Lunglenga thih mai hi em ni mihring chan tawk?
He December leh a vuakvet hi awmlo min hriat chhuahtirtu leh nunhlui min ngaihtirtu mai em ni lo ni? tia ka inngaihtuah lungchhiat lek lek laiin, ka ngaihtuahnaah thil pakhat a lo lut a.
Tichuan, December hian lung a tihlen rual rualin, he December thla hian Chatuan hraileng kan nih a, hlim leh lawma kan intawhkhawm leh theihnana kan Lalpa lo piang min hriat chhuahtir ta a. Chuvang chuan lunglen tirehtu leh min thlamuantu a lo ni! Lung tilengtu hi lunglen tirehtu a ni.