Sialkal Range Development Council (SRDC) meeting, an Chairman Dr. L. Thangmawia hova Mimbung-a nimina neihin, SRDC Manual hman mek ennawntu review committee rawtna siam, Draft SRDC Manual – 2022 chu sorkara kalzel turin an pawm.
SRDC Headquarters office, Mimbunga SRDC Council meeting hian SRDC huamchhung khaw hrang hrangah faina leh thianghlimna kawnga beihpui thlak an rawt a. Kumthar kumbul lamah hmalak nghal ni se, an ti.
Council huamchhunga zirtirtu indaihlohna bik khua – Vaikhawtlang leh Selam khuaa zirtirtu rawih te hnena lawmman pek dan tur te leh, SRDC hnuaia Culture & Literature committee-in tunhnaia report an thehluh pawh sawihovin an pawm a. SRDC area-a sorkar leh khawtlang enkawl school-a pawl 9 leh pawl 11 zirlai thlanchhuah bik te tan kumthar school chawlh hun remchangah study tour buatsaih rawtna pawh an pawm a, council member te tana exposure tour neih an rawt bawk.