Pathianin min hmangaihna hi a nasa em mai a, mihring tawnga hriatfiah thiam phak bak a ni. A fapa neih chhun pawh kan tan nun hlan turin a rawn kaltir hial mai a, a ropui asin. Khawvel sual tlan turin mihring angin a rawn piantir a, a rawn seilentir ve thlap bawk. Sawi leh hril zawh sen pawh a niawm love, a ropui tak zet a ni. A ropuiin a sang a, a thuk bawk a. He “Agape” a ropui asin!
Krismas leh Kumthar hunpui duhawm takin min hmuak a, he hun lo thleng tur hi kan hman dan leh inbuatsaih dan pawh a inang lo nuk ang. Mahse, min chhandamtu pianni hi ama duh dana am taka kan hman erawh a thiang a, khawvel thil dang tihkawp nen erawh a rem lo.
Pathianin khawvel chu a zuk en a, duh taka a siam mihringte sualzia a zuk hmu a, a lungngai a, a rilru a na a, a mittui a tla hial asin. A fapa duat lai, a hmangaih ngawih ngawih chu kan tan nun hlan turin, mihring anga lo piang a, seilian turin a rawn tir a. Chu chu a ni, khawvel sual tlan tura a rawn din ngei chu!
A hmangaihna hi kan fak tawk lo fo a, kan hrefiah zo hek lo. Mahse, pawi a ti lo a, amah kan hnaih a duh em em a, khawvel thil dang nena chawmpawlh a phal lova, kaihkawp chi lah a ni hek lo.
Kan tana naupiang lawm tura kan inbuatsaih dan a inang lo zung ang. AMAH hlat chunga lawm tum lo ila, khawvel hri leng karah hian khawvel sual tlan tura lam zawk chu i en hram hram ang u. Chu chu a duhthusam a ni si. Kan hmuh ngai loh kumthar min hmuhtir a tum bawk a, a tana hun hmang tur hian hun tha min va pe nasa em.
Kan thil tih leh ruahman engkimah hian amah rawn chungin, danglam ngam turin i inbuatsaih sauh sauh ang u.
Chhiartu zawng zawngte, Krismas leh Kumthar chibai kan buk vek a che u.