Portugal chuan 2022 World Cup quarterfinal a an tlak hnuah an coach Fernando Santos nen an thawhhona an tihtawp thu Ningani zan khan an puang.
Kum 68 mi Santos hian kum m2014 khan Portugal hi a enkawl tan a, a hnuaiah an ram chanchin a vawikhatna atan senior level-ah ram inelna lianah champion in Euro 2016-ah a champion pui.
Greece national team pawh lo enkawl tawh hian kum 2019 UEFA Nations League-ah pawh a lo champion pui tawh a ni.
Qatar-ah erawh beiseina sang tak nei mahse Morocco lakah quarter-final ah an tlawm a. Euro 2024 thleng daih contract nei mahse Portuguese football thuneitu Federação Portuguesa de Futebol nen inbiakna neiin a contract tihtawp a ni.
FPF chuan, “Portuguese Football Federation leh Fernando Santos te chuan kum 2014 September atanga hlawhtling taka zinkawng kan zawh dun chu tihtawp kan remti tlang.”
“Tun World Cup-ah knockout stage-ah team tha zingah kan tel thei a, kan zinkawng a tawp hnuah erawh FPF leh Fernando Santos te hian bung thar kan kai a, chhuan thar tan kawng hawn a hun tih kan pawm.”
“FPF chuan national team coach thar tur zawnna hi a kalpui tan nghal.” tiin an sawi.
Santos chuan a chhuah thu puan a nih rual hian Portugal coach a ni thei chu a tan suangtuahna a tak ram chang zingah a tel tih a sawi ve bawk.
Tun World Cup-ah Portugal in team tha nei mahse pawn lam boruak an nei tel a. Star player Cristiano Ronaldo chungchangah pawn lam thawm a tam.
Group stage-ah bul tan tir a nih thin hnuah knockout stage-ah awltir a ni a, hei hian sawi zui a hlawh hle a. Morocco laka an tlawm avangin thuthang a ti tam zual.