Khawvel infiamna a ennawm lian a hmawr bawk a ni dawn. 2022 Qatar World Cup final chu Pathianni zanah Lusail Iconic Stadium-ah an khel dawn a, champion tura duhtu ngah Argentina leh champion lai France te an inkhel ang.
Sang taka beisei a awmna inkhelah Les Blues in kum 24 chhunga world champion ni zawn thei hmasa ber nih an tum a. Final an luhna kawngah beisei khum a che tha Morocco chu an paihthla.
Lehlamah Lionel Scaloni pawlten a zawna final khelh tum Croatia lakah chiang takin hnehna an chang a. An thiampuipa, khawvela football thiam ber Lionel Messi chu World Cup nena ram tana a hun khar tir an tum ruh hle.
Team pahnihte
Argentina team an tha a, tlarhmaah phei chuan duhthlan tur an ngah. Chutihrualin mi pakhat in midang zawng aiin ngaihven a hlawh a, chu chu Lionel Messi a ni.
Kum 35 mi a ni tawh a, tunhma angin khelmual chhungah ropui filawr taka chet reng a harsat ve tawh. Mahse Messi chu Messi a la ni a, tun World Cup-ah khawvela player tha ber zingah a la telna chiang takin a lang.
Argentina football khelhdanah a la pawimawh reng a, a goal khung leh midang khung tur a siamsak piah lamah goal an nawr kawnga a ke atanga ball fing chhuakte, midangte hmunawl siamsak tura a tlan thiam dante hmuh hmaih a thiang lo.
Ballon d’Or vawi sarih dawng tawh Messi hian World Cup zawhah ram tana inkhelh a chawl dawn tih a sawi tawh. Trophy nen haw ngei a duh.
Argentina team erawh amah chauh an ni lo. Tun tumah final lut turin tlar tinah player fak hlawh an kawl.
A hnungah goalkeeper Emiliano Martinez-a’n inrintawkna a ngahzia bawkin fak a hlawh. Defence-ah Nicolas Otamendi chu a vanglai ang maiin a la inkhel a. Midfielder Enzo Fernandez-a’n khawvel club liante ngaihven a nih chhan a lantir.
Tlarhmaah Messi-a kawppui atan Julian Alvarez chuan a hmun a ti nghet bawk.
World champion France hi Argentina hma a zam tur an ni bik lo. An star player thenkhat – Paul Pogba, N’Golo Kante, Karim Benzema te tel lo mahse an la thatzia Qatar-ah an lantir.
Kylian Mbappe-a’n a hlawh hnem chhan a lantir a, an ram chhandamtu a ni thin. Striker Olivier Giroud a la ‘class’ reng.
A hnung lamah a u inhliam avangin rinrawl a nih a ngai a, mahse Theo Hernandez-a’n a kova mawhphurhna tla chu a phur zo tehreng. Ibrahima Konate in khawvela defender tha zingah a tel tih a lantir bawk.
World Cup dawna ko Randal Kolo Muani thlengin goal an khung vek.
Team news
Argentina in Netherlands an hmachhawn tuma inkhel boruak sangah yellow card an hmuh avangin Marcos Acuna leh Gonzalo Montiel te an chhawr thei lova. Final erawh an khel thei tawh dawn.
Tlarhnungah duhthlan hmasak an nih phah a rinawm chuang lova, right-midfielder pawh let Nahuel Molina a kheltha.
La Albiceleste tana chiang lo awmchhun chu Alejandro Gomez a ni a, hetihlai hian Messi-a’n Croatia a hmachhawn tuma a malpui a dawm leh thin avangin Argentina tantute ngaihtuahna a kal thui.
Midfield-ah erawh Leandro Paredes a tlan taima a, Fernandez leh Mac Allister te nen an inkawp leh hmel hle.
France erawhin buaina an nei. Qatar a an stadium air conditioning an ngeih loh avangin player thenkhat an dam lova, hei hi an team camp-ah a darh niin an sawi.
Dayot Upamecano leh Adrien Rabiot te an dam loh hnuah Kingsley Coman chu a dam loh ve leh a, Raphael Varane leh Konate te pawh an dam lo tawh niin sawi a ni tel.
Rabiot leh Upamecano te erawhin dam lam an pan a, fit tha hman tura ngaih an ni.
Tlarhma lamah erawh buaina a awm lova, Mbappe leh Giroud te inkawp chu tun World Cup a harhtharna chang forward Antoine Griezmann-a’n a chawm leh ang.