Spanish champion Real Madrid chuan an lo tih fo tawh thin angin Brazil atanga rawlthar beiseiawm lo chawrchhuak an lalut leh dawn a. Palmeiras forward Endrick chu kum 2024-ah an lakluh tur thu an puang.
Ningani zanah Los Blancos hian hun engemaw chen atanga an ngaihven tawh khawvel football player naupang talent nei tha ber zing ami nia sawi hi an lakluh tur thu an puang a. Tunah kum 16 ni mekin kum 18 a tlin hunah kum 2024 July ah Madrid-ah hian a insawn ang.
Palmeiras chuan club pahnihte inkara inremna chu puanzar theih a ni lo tiin an thup a. Nimahsela Spain leh Brazil lama chanchinbute sawi danin Real Madrid-ah hian kum thum contract a ziak phawt anga, kum thum dang ziah belh theihna a awm ang.
A insawnna a sum che vel zawng zawng tur belhkhawm hi Euro maktaduai 72 vel ni tura ngaih a ni.
Real Madrid lamin thuchhuah siamin, “Real Madrid, Palmeiras, Endrick leh a chhungte chuan kum 2024 July-ah a kumin a tlin hunah Real Madrid a zawmna turin inremna an nei.”
“Hemi hma erawh hi chuan Endrick hi Palmeiras-ah a awm anga, Madrid a training-na hmun a tlawh thuai ang.” tiin an sawi.
Palmeiras president Leila Pereira chuan, “Brazilian football a inremna lian ber kan ti fel a. Real Madrid hnen atanga indawr tura sawmna hi Endrick-a talent ropui tak phu a ni a, inbiakna kan neih tan atangin keini lamin a tana kan lo beisei lawk ang zawng zawng kha a huam a ni.” tiin a sawi ve bawk.
Ball pet dan a thiam avanga lar tak forward hian ngaihven a hlawh a. Europe club lian zingah Barcelona, Paris-Saint Germain leh Chelsea te nen pawh sawizawm nimahsela umzuitu langsar ber Real Madrid a thlang.
Real hian tunhnaiah player bazar a an chet dan an thlak danglam a. South America a rawlthar beiseiawmte lak chingin tunhnaiah Vinicius Junior, Rodrygo Goes leh Federico Valverde te an lakluh an ti fuh.
Endrick hian kum 16 mi niin October khan first team tan football a khel tan a. Palmeiras chanchin a goal khung thei naupang ber niin Athletico Paranaense lakah goal hnih a khung a. An tan vawi sarih inkhel tawhin goal thum a khung tawh.