Greater Noida-a thubuai danglam angreng tak a thleng a, Indian Express chanchinbuin a tar lan dan chuan a ui an duh avang ringawtin mi pakhat ruk bo a ni.
Nilaini zana Greater Noida-a Alpha2 venga thil thlengah hian mipa pathum an inhnamhnawih a. Mi ru botua puhte hi Vishal Kumar, Lalit leh Monty an ni a, an vai hian Aligarh-a cheng vek an ni.
An pathum hian Mahindra Scorpio hmangin Rahul Pratap-a an ru bo va, Aligarh an panpui.
Pratap-a unaupa, Shubham chuan police hnenah heng mi pathumte hi Unitech Horizon society-a an chennaah kalin Rahul-a chu a ui vul lai pe turin an ti a, ani chuan a lo phal lo tih a sawi.
An inhnial buai zui ta a, mipa pathumte hian Pratap-a chu tharuma nawrin Scorpio-ah an dah lut a, an tlanpui ta daih niin a sawi.
Indian Express-in a tar lan zel dan chuan ru botute zinga pakhat hian Pratap-a phone chu hmansakin a chhungte a bia a, ui chu an pe lo a nih chuan an thah tur thu a hrilh.
DNA chanchinbuin a tar lan ve dan chuan Pratab-a hi Aligarh bula kawngpuiah an chhuah a, hei hi a chhungten police hnenah thlenin thubuai an ziak lut a, zawn mek an ni tih an hriat vang nia tar lan a ni.
Pratab-a hian zingah Greater Noida a thleng leh a, Beta-2 police station-ah amah rutu mi pathumte lakah hian complaint a thehlut zui.
Police pawhin Indian Penal Code (IPC) Section 364 (kidnapping) hmanga thubuai ziak lutin mi pathumte hian chhui zui mek a ni.
Police chuan hetianga tlangval pathumte chet chhan hi an la hre lo va, an man thuai erawh an inring.
Pratab-a chu a chhungte hnenah him takin a let leh tawh thung.