Aizawl Municipal Corporation Board of Councillor Meeting chu nimin khan Aizawl Mayor Lalrinenga Sailo kaihruaiin neih a ni.
Thutkhawm kaihruaitu, mayor chuan AMC area chhunga kawn chei tha zual 20 thlanchhuah hnenah Rs. nuai sawm AMC-in a pe chhuak dawn tih a sawi a ni.
Board of Councillor thukhawm chuan Building Regulations-ah ‘Modernization of Building Bye-Laws’ telh an pawm a, building leh electric hrui inkar zau zawng chu Measures Relating to Safety & Electricity Supply Regulations, 2010 anga kalpui a ni tawh dawn.
Aizawl-a 5G launch a nih theina tura inbuatsaihna kal meka tih tur pawimawh, Mizoram Telecom Infrastructure Policy, 2020-in kalphung a lo siam tawh ang zulzuiin AMC Building Regulations, 2012 her danglam a nih theihna tura rawtna chu pawm a ni bawk.
Heng bakah hian Mizoram Municipalities (Property Tax Management) Rules, 2014-in kum 5 dan tala property tax area classification ennawn thin tura a phut angin meeting-ah hian area classification ennawn a ni.
Zemabawk East leh Zemabawk West te Zemabawk Local Council atanga indan an dilna chu uluk taka sawiho a nih hnuah phalsak an ni a, ti hian Aizawl khawpui chhungah local council 87 a awm dawn ta a ni.