MZP General headquarters hruaitu ten Bangladesh aṭanga Mizorama raltlan Zofa, Chamdur P, Mautlang, Vaṭhuampui leh Parva III-a awm te tlawhin, Sialsuka ZOFEST hman zawh taka raltlante puihna bawm an huna tanpuina sum tlingkhawmte an hlan.
Raltlante hi Chamdur P, Mautlang, Parva leh Vaṭhuampui-ah te an awm mek a, anmahni lo ngaihvena a tul anga buaipui turin an awmna khuaah -Village level committee on Bangladesh Asylum Seeker- din vek a ni tih MZP hruaitute chuan an sawi a. In 70 vel khua Chamdur P-ah raltlan chhungkaw 14, In 70 vel khua bawk Mautlang-ah raltlan chhungkaw 10 vel, In 300 khua Vaṭhuampui-ah raltlan chhungkaw 23 leh In 60 khua Parva III-ah raltlan chhungkaw 34 vel an awm mek thu an sawi.
MZP hruaitute chuan raltlan te hian Damdawi, mutbu, thawmhnaw, silpaulin, tui dahkhawlna, bungbel leh hnathawhna hmanrua te an mamawh hle niin an sawi a. Ei leh in danglam avanga damlohna in a tihbuai an awm nual niin an sawi bawk.
Raltlan te tlawha tanpuina hlan hian MZP Ass. Gen. Secretary Chinkhanmanga Thomte hovin hruaitu dang te an kal a ni.