- Zirsangkima
‘Pári saw chu ka duh ve reng; ni ila pawh ka ti; mahse … kan rethei sia …’ ka tia, ka thiana bulah chuan. Min khawngaih ve ngang mai!
En teh, ‘Fahrah’ — he hming hi ka hua a nia! Ka chanvo atán rêng hian Khuanu’n a lo ruat si a. Ka chang ta char char mai a … hahthlâk ngat ngat tak a ni!
Kumin hian college kai ve tan tùr chu ka ni ve. Mahse … ka kai ngam lo! Admission fee te chu nei ve e. Thenrual kawmna tùr sum ka nei zo lo! Ka nu hi a chakvak tawh si lo a, bazara chawhmeh zawrhpui a ngai deuh sek tawh bawk si a.
Kum li liam ta khân ka pa’n mual min liamsan a. A aiawh zo tùr zia rêng ka ni si lo. Ka nau, mipa ve tho lah hi, a beng chhêtin a kè a la bai zui a! Enkawl ngai rengin a awm a. A khawsak loh theih loh hi kan khawsa ve nãw nãw chu a ni ber e.
Hetia fahrah han nih tâka hrehawm ka tih bera chu, thenrual pàwl hi a ni.
Darthlalanga inen ngai lo ang hrim hian, mahni sakhmél phú loh a sam sei chi lah hi kan lo hre ve roh si a! A duh tha tha leh a duh tui tuiah kan lo tang ve roh a! Love letter ziah lah kan sam zawng leh kan beih thlum theih zawng lah lo ni. Phú loh hi kan chhai thlu zeng zung ang roh a. Mahse, lèn chhuahpuite an lo ngai a, thingpui dàwra chawlhpuite an lo ngai a … chûng hunah tak chuan alãwm hrehawm thìn chu ni!
Thiante chuan maw … an ti nek nek a, sum te hi an nei mai zêl a. Kei chu maw … ka nau OPD kalpui hnuah, ka nu chawhmeh khulpui hnuah … chuan, ka hman ve mai. Mahse, ‘hman’ han tih hian ‘sum’ a chhawm a lo ngai ve zêl mai a. Chu tak chu a ni ka buai thinna chu!
Aw … Siamtu hian fahrah tùr bîk hian min siam nge maw’n le, te ka ti thìn—a cháng chuan. Nupui nei rual te pawh ka ni ve tawh êm êm—kum 36 mi, la tlangvál reng han nih vah mai te hi zaha lâk cháng ka nei fo! Ka nu pawh hi a mangang êm êm tawh. Duh loh záwng chu ka duh aia tam ka hmu tawh. Heti chung chunga min hmangaihtu pawh ka hmu ve tho. Mahse, kan khawsakin Mo neih a support miau hek si loa le!
Khu laia mi, Lucy te khu ka duh ve lutuk; ani paw’n min iai loin ka hre ve. Mahse, han bêm dáwn êm chuan ka ngam ngang si lo! Hmãn zàn khawhar in kalpuiah pawh min rawn sàwm chat kha. Mahse, ka inkiltawih zo vek tawh a. Kan véngah hian hmeichhe han biak ngam alawi pawh ka neih tâk loh hi!
BA ka zir chhuak thei lo. Nia, college ka chhuak lo. Lehkha ka thiam loh vàng ngawr ngawr a ni lo—ka sawi chu, kan khawsakin rual a rem ve lo a ni ber e. Ni lo se, ka zir ang—MA thleng thleng te pawh! A cháng chuan mi fa nih te hi ka châk thìn. Mi fa han nih a, zirna in sáng han thlen te hi ka châk ve. Mi fa han nih a, MA thleng thleng te han zir te pawh ka châk ve thìn. Mi fa han nih a, nupui han neih a, ka nu han chhâwktu tùr han neih ve a, office bàna thingpui min lo chhuansaktu tùrte pawh neih ve te hi tha ka va’n ti tak. Mahse, ka nu fa ka ni miau si a … Fahrah ka nih hi!
Rairah mah ni ila, mi fa chu ka ni lul lo ang! Mi dang fa ka ni lo a, ka nu leh ka pa fa ka ni e. Ka thlen chinah hian, ka tawn chinah hian lungawi ka zir a ngai a, làwm pawh ka thiam a ngai a nih hi.
K Lalchamliana hla kha ka hre reng thin—‘Rairah Tân Zawng!’ tia a sak ngawih ngawih kha. He ka chanvo hi ka tuar tùra Khuana rèl sa a ni e.
Ka zir ngai taa chu, ka tawn china làwm hi a ni. Eng ang pawh ni ila, eng ang pawh tawng ila, ‘Lãwm zêl tang e’ tih theih nun hi a ni ka mamawh ber maia chu.
A cháng chuan, hringnun hi a harsa thìn—nun hrim hrim mai pawh hi! Mahse, min dina min siamtu Pathianah hian làwm phawt mai ila … chu aia tih theih sáng hi kan lo nei reng reng lo mai a. Dam ve mana inchhìra awma indawm kun reng ai chuan, Lalpaah hian làwm mai ila … chu chu kan làwmna tùr tho a ni.
Hei, kum thar kan lo chuang kai leh ta reng mai a; he kum tharah hian làwmna tùr dap ve ang aw … Kum khati leh zât kha kan lo vui tawh a, hnualna tùr kan lo zawng tawh a, phunna ká-in kan ká a khat liam thìn a, i lãwm ve tawh teh ang u khai.
Kei pawh, rairah ka nih hi ka en reng tùr a ni lo a; rairah ni chunga malsàwmna ka dawn hi ka chhiar a ngai zâwk a ni. Hawh u, vuivai loin, phun loin, hnual loin he kum thar hi i hmang teh ang u.