- H. Laldingliana
2022 kumhlui kan thlah hnuin kum nga dana awm thin MLA election kum kan chuangkai a, party workers tan thahnemngai taka thawh kum a nih laiin politics khel lo tan pawh election boruak hian min chîm hneh hle thin. Party inbeihna dah thain MLA election lo thlir lawk dawn teh ang.
Mizo Union a ral hnuin regional party chak tak PC party alo piang a, PC party pawh chu a rawih chho ve ta zel a. MNF leh Congress chu hun rei tak an inbuan chho reng a, PC party tlemte la awm leh MNF N, (ZNP) ni ta ten seat tlem azawng la ve thin tih loh chu awmzenei thamin Zoram politics ah party dang thawm a awm ngai meuh lo.
MLA 29 neia sorkar mek MNF te hi 2018 election-ah an beisei zat seat an la em tih zawhna ka nei fo a, atam zawk chuan MLA 30 chuang neih an inring hlawm a, beisei an phak lohna chhan hrang hrang zingah Aizawlah rin aiin ZPM boruak alo tha alawm le an ti deuh vek a. Thingtlang lam an chet thatna kha sorkarna khawp a ni a, hneh takin an sorkar ta tho a.
State tam takah party pakhat a zawna term hnih leh term thum sorkar kan hre thin a, Kan state-ah chuan a zawna term thum sorkar an la awm ngai lo, mipuiin term hnih milin vote kan thlak thin ni berin alang. A chhan hrang hrang sawi tur atam thei hle ang. Kan state-a term hnih zel sorkarna kan pekna chhan pakhat heti hian sawi ila a fiah mai awm e. 2013 ah NLUP thlipui tleh vangin Congress kha party dangin beihrawn teh mahse 2008 aiin MLA an ngah a, hneh takin an sorkar nawn kan ti thei ang.
Election-a thil pawimawh tak chu candidates-in awmzia a nei thui hle tih kan hria, MLA mai ni lo, VC, LC leh AMC ah candidates enin mi tam takin vote an thlak thin. MNF hian hmana politician senior tak tak an vawrh thin ang kha kal pelin thalai lehkha thiam zawk leh tunlai mi vawrhchhuah nachang an hria a, hei hi an sorkarna chhan pawimawh tak a nih bakah sorkar hmingthatna an ni pha awm e. Chhungkua zawng zawng nitin mamawh Gas, Buhfai, tui thianghlim leh kawngpui tha zawk kan nei te hi mipui tan a lawmawm hle a, Pu Duhoma tawngkam hawh ila, “a ngaihna hria” in heng Department-te hi an enkawl vang a ni kan ti thei ang.
MNF MLA zingah kum naupang tak leh viak tha tak tak an tam hle laiin kum upa zawk, upain thluak fim an tih ang kha a mawi tawk an awm bawk a. Kum upate hian rorelna kawng hrang hrangah tangkaina leh hlutna tam tak nei thin. Ram pum chu sawi loh, khawtlang rorelna kawngah pawh upate thurawn la peih leh hmang tangkai thiam tan rorel a sual ngai meuh lo an ti thin. Chu chu kan state rorelna sang ber Assembly rorelnaah pawh kan hmu fo thin a, a pawlh mawi tawka kum upa zawk kan vawrh chhuah thiam hi a pawimawh reng dawn. Bial vil tha hleithei lo khawpa upa tan erawh mahn inhriat a pawimawh hle thung.
MNF hian sorkar nawn lehna chance an nei em tih hi patling inhnial laih laihna tham a tling. Tun term hi eng party pawh sorkar se sorkar vanduai tak an ni hrim hrim a, kum 3 deuh thaw covid pandemic vangin development works an thawk mumal lo kan ti thei ang. A tibuaitu hi inhrilh ngai lova kan hriat tlan vek ni mahse opposition lamin an haider sak thiam hle a, hei hian opponent tan sorkarna chance a siam pha angem tih chu zawhna pawimawh tak, rin thiam harsa tak a ni.
MNF in sorkar nawn theihna chance an neih zingah a paihthla thei khawpa lian party an awm lo tih hi politics chîk mite hmuhdan a ni. Sorkar lai paihthla tur meuh chuan opposition party lian tak leh chak tak an awm a ngai thin, tuna opposition party-te dinhmun hi uluk tak kan en chuan sorkar lai tan muttui lohna tham nektu an awm lo a tih theih ang.
Mizo Union party kha din anih hnu lawkah awlsam takin a sorkar a, PC party pawh din anih hnu lawkah Zoram chhim tawp, hmar tawp, khawchhak leh khawtlang kil tawp thlengin PC thli a tleh a, hun rei loteah hneh takin an sorkar nghal bawk a. Congress party pawh a sorkar dawn khan Aizawl khawpuiah chauh an lian a ni lo, Zoram dung tluanin Congress thli a tleh a, Tawngkawlawng thlengin Congress Unit tha tak a ding vek a, term tam tak a sorkar a, tun dinhmunah hruaitu inthlak leh tla hlim hlawt an nihna alang a, an tha a zuai hle a, an lakah mipuiin beiseina kan nei rih lo mai pawh a.
MNF hnaihtu ber ZPM hi din a nih khan neutral thlawp an hlawh hle a, kan hriat angin 2018 ah ZPM hian political party system dah boin party hrang hrang kalkhawmte’n movement an din a, neutral paw’n an lakah beiseina sang tak an nei. Hun alo kal zel a, movement kha dah thain political party pakhatah an insiam ta nge nge a.
ZPM din a nih hnu hian VC, LC leh District Council pahnih election kan hmachhawn tawh a, hengahte hian MLA an neih ngah ang huin an chetha tawk lo hle a, LADC, MADC ah vote an la nei mang lo tih alang. VC leh LC ah pawh mipui beisei an pha lo hle bawk.
Kan sawi tak ang hian state khata sorkar meuh tur chuan chhim lam chauha tam viau emaw, hmar lam chauha that viau a tawk lo, ram puma tam hle a ngai. ZPM hi Zoram pumah an la inzarpharh lo hle tih tih kan hmu zo chauh a, sorkar tura a thli tleh kan tih ang kha an la pha lo hle. Hengte avang hian rorellai MNF hian sorkar lehna chance an nei tha hle tih alang ruak mai.