Brasilia khawpuia sorkar hmunpui pawimawh tak tak an luhchilh mai theih chungchangah hian venhimna a tha tawk loh hle nia sawi a ni.
Al Jazeera reporter chuan, “Bolsonaro thlawptute hian an Telegram channel hmanga inhawr khawmin hetiang hi an huaihawt a, kar hmasa chhung khan bus hmangin mi za telin Brasilia an pan khawm a. Brasilia-a venhim hna thawktute an che muang lutuk kha a mak a, mi tam tak chuan military police leh armed force-te an chet thuai loh chhan hi Bolsonaro-a thlawptu an ni-ah an ngaih phah a ni,” a ti.
Lula erawh chuan Brazilian police rinhlelhna leh rinngam tawk lohna a awm tih thuthar lakhawmtute a kawmnaah a sawi a, heng officer-te hi hrem an ni ang a, an hna atang pawhin bân an ni dawn tih a sawi.
Al Jazeera chuan social media-a video thehdarh hmasak lamah chuan military police awm an tlem tih a lang a, officer pakhat phei chuan mipuiin Congress an pan dul dul lai chu a phone-in an thla a laksak mai mai zawk a ni tih a tar lang.
“Lula-a tum ber chu hetiang thil thleng tihtawp leh thleng leh tur ven a ni,” tiin a tar lang.
Bolsonaro thlawptu ni thin, Brasilia Governor Ibaneis Rocha chuan venhimna that tawk loh avang hian zawhna a dawng tam hle a, a chief of police, Anderson Torres chu a bân nghal tih a sawi.
Website UOL chuan Torres-a hi president hlui awm mekna, Orlando, Florida-a awm ve mek niin a ta lang a, amah erawh chuan Bolsonaro nen hian inbiakna an nei lo tih a sawi.
Attorney general pisa chuan Supreme Court hnenah Torres-a man phalna a dil nghal a. High court hnenah pawh ventlang venhim hna thawktuten sorkar hmunte la leta sorkar dotute hnawh darh phalna an dil bawk.