Delhi leh India hmar lam hmun thenkhat chu chhum leivak (fog) chhah takin Thawhtanni tuk khan a zin hnan a, khaw hmuh theih chin thui zawng pawh a tawi lai ber tawngin rel kal tur 29 vel lai an chhuah hun tihkhawtlai a ni tawh.
Thawhtanni tukah khan ram khawpui berah hian metre 200 vela thui bak khua hmuh theih loh khawpin chhum a zing nasa a. Lirtheite pawh dan pangngai aia muang fea tlanin hazard light an tieng hlawm bawk.
Hei aia hma lehzualah chuan Delhi thlawhna tumhmunah chuan fog alert tihrik a ni a, khaw hmuh theih chin a tawi lutuk tih sawi a ni.
Thlawhna thlawk chhuak leh lut tur 40 vel zel a buai phah a. Thlawhna thenkhat chu an kawng thlaksak an ni a; mahse, tihkhawtlai liantham erawh a awm lo.
India Meteorological Department (IMD) chuan India hmar lam pumah chhum leivak hi a zing dawn tih an sawi lawk a. Punjab-a Bhatinda-ah phei chuan engmah hmuh theih loh (zero visibility) a ni tih weather department hian Pathianni zan tlai tawh taka data an tihchhuahah an tar lang.
IMD hian Thawhtanni tuka thlalem atanga thlalak an tihchhuahah chuan chhum leivak zing hian Punjab leh Rajasthan hmarthlang atanga Uttar Pradesh, Haryana leh Delhi a tuam tih a lang.
Railways chuan khaw hmuh theih chin a tawi em avang hian rel 29 chu an chhuah hun tihkhawtlai a nih thu leh darkar hnih vela an tlai hlawm thu a sawi.
Weather office chuan Inrinni khan ni hnih chhung, Thawhtanni thleng kha India hmarthlang lam chu khaw vawt vin takin a tuam dawn tih an lo sawi lawk tawh.
Khua a vawh mek zel laiin India khawpui leh hmar lam hi chhum leivak hian a zin hnan mek a. Delhi-ah chuan Pathianni khan 1.9°C niin kum 10 liam ta chhunga a vawh ber tum dawttu a ni hial.
Khua a vawh em avang hian Delhi sorkar chuan kaihhruaina siam tharin mi mal sikul zawng zawngte chu January 15 thleng la inhawng rih lo turin a ti a ni.