Mizoram Pradesh Congress Committee (MPCC) President Lalsawta chuan central lamah Congress sorkar lo mah se kum 2023-ah hian Mizoramah an sorkar dawn niin a sawi.
Nimin khan kum 2023 atan Congress Bhavan hawnna neih a ni. Hawnna inkhawma thusawitu Lalsawta chuan miin an hriat chian loh avanga central-a an sorkar loh chuan Mizoramah pawh Congress a sorkar dawn lo ti thin mah se central-a Congress a sorkar loh avang maiin Mizoramah Congress tan a sorkar theih loh tihna a ni lo tih a sawi a, “Central lamah sorkar lo mah ila, kum 2023-ah hian Mizoramah kan sorkar dawn,” a ti.
Lalsawta hian kum a thar angin rilru thar, duh dan thar, nun dan thar nen bul tan a, mi tling lo leh famkim lo tak tak an nih inhria a tihnuam tak leh thuawi taka awm phawt tur leh candidate-te tihautak loa an tana phurrit siam lo thei ang ber zawnga chet tum turin party mite a chah.
MPCC president hian Congress an sorkar chuan ram hmasawn nan power mamawhna a san tial tial avangin power siam chhuah belhna hi an ngaih pawimawh tur thu leh, ram thenawm nena dan anga insumdawn tawnna mumal taka an siam tur thu a sawi a. CYMA leh Synod-in corruption do an puang tawh, mi tam ber telna pawlten an duh ang ngeiin Congress hian corruption an do dawn tih sawiin, “Congress sorkarah chuan tumah an corrupt lo ang. Mizoram hi mi taima leh thawk rimte dinchhuahna leh hlawhtlinna ramah kan siam dawn,” a ti.
“India rama sakhaw zalenna nekchepa a awm mek avangin Mizoram kohhrante, Kristian tha tak takte hian sakhaw zalenna a taka kalpuitu Congress party an sorkar leh hi an nghakhlel,” tiin, India ram pumah leh Mizoramah an sorkar leh a ngai niin a sawi bawk.
MPCC Treasurer Zodintluanga Ralte, MLA, kaihhruai inkhawmah hian Congress President Lalsawta’n Upa Dr. RK Lallianthanga, Mizo Scientist, Chief Scientific Officer (Rtd), Science & Technology chu Congress party-ah a lawm lut a ni.