AIZAWL: Larsap Hari Babu Kambhampati-a’n nimin khan Raj Bhavan-ah State Bank of India (SBI) leh Regional Rural Banks (RRB) hotute a kawm a. Bank hnathawkte chu an hun awlah hawker te, dawrte nghak te leh chawhmeh zuar te tlawh kuala bank atanga an sumdawnna pui tura pawisa an puk theih chungchang te hrilhfiah turin a ti.
Bank hnathawkte chu PMJDY, PMJJBY, PMSBY, etc., scheme-ah beneficiary tam zawk ziak lut tura tan la chhunzawm tur pawhin larsap chuan a chah a. Sumdawng tenau zawk – dawrte neia khawlaia thu, chawhmeh zuar leh a dangten loan an lak theihna tura tan lak a tul thu a sawi.
Larsap chuan tun hnaiah bank lamte an thawkrim tih a hriat thu sawiin lawmawm a tih thu leh tan lak zel erawh a tul thu a sawi a. Central sorkar hnuaia scheme tha tak tak atanga tanpuinate customer leh beneficiary-ten an hmuh theihna tura inziak lut thar an pun thu pawh SLBC report atanga a lo hmuh thu leh lawmawm a tih thu a sawi.
Sumdawnna tenau zawk hmanga eizawngten hma an sawn zela an sumdawnnate an tihlen theih nan Mudra Shishu loan (Rs 50,000 thleng) leh Mudra Kishor loan (Rs 50,000 atanga Rs nuai 10 thleng) an puk theih thu te an hriatchian a tul thu larsap chuan a sawi bawk.
SBI leh RRB hotute pawhin mipuiin tangkai zawka bank an chhawr theihna tura an hmalakna hrang hrangte larsap chu an hrilh bawk a ni.