Aizawl : ZPM chuan nimin khan kum thar atana an pisa hawnna inkhawm an buatsaih a, he huna thusawitu ZPM Leader Lalduhoma chuan, “Kan ram leh sorkar tichhe thin tute hi tute nge kan tih chuan, ruling party zel hi an ni,” a ti.
A tha zawnga hmahruaitu tur ruling party awm se mipuite’n an zui dawn tih sawiin, “Kan ram chu kan siamtha mai tur hi a ni a. Nimahsela, ruling party apiang mai hi unit leh Village Council atanga a lu ber thleng hian an hna hi a chhe tlangpui viau zel mai,” tiin, tun hnaiah pawh Bualpui (Ng)-a CHC sak chu Joint YLA-in an chhut chhiat sak hial a. ZPM hi an lo sorkar a nih chuan chutiang chu an ni ve thei lo a, an danglam tur a nih thu a sawi.
Lalduhoma chuan ZPM chu beidawng tawh te’n beiseina thar an nghahna awmchhun an nih avangin mite tibeidawngtu an ni ve thiang lo niin a sawi a. Khelh fuh tum lo in, khelh dik tumtu an ni tur a ni tih a sawi a. “Tu party emaw tal chu kan ram Maichamah hian inhlan ngam kan awm a ngai tawh. Sorkar tha kan din dawn chuan, sorkar hunah ni lo in, tun atang hian kalphung tharin a theih chin chin kan kal tur a ni,” a ti.
Mi hausa hi hlauh tur an nih loh thu leh an laka zam mai tur a nih loh thu a sawiin Lalduhoma hian, “MPF leh Kohhran hrang hrangte mit tikhamin kan awm tur a ni lo,” a ti a. Tun laia media lama an inbeih duh dan leh an tawngkam hman duh dan chu a bawlhhlawh tiin, ZPM erawh chu tawngkam hawihhawm hmang hram hram turin a chah bawk.
ZPM party chhung inkhawm hi Lalthansanga (Chatea), Ex-MLA, Vice President in a kaihruai a ni.