Premier League club pahnihten season khar that an tum a, hemi tur hian an squad tihchak an tum mek. Arsenal in Shakhtar Donetsk forward Mykhailo Mudryk lakluh tumin Ukrainian club inbiakna an neihpui.
Kum 22 mi hi Europe a attacker ngaihven hlawh ber zing ami a ni a, ngaihventu club pawh a ngah.
Gunners hian Ukraine international lei an dilna hi vawikhat hnawl a ni tawh a, mahse club pahnihten inbiakna an la chhunzawm reng tho.
Shakhtar director of football Darijo Srna chu kar hmasa atang khan London-ah a awm mek a. Club pahnihten inremna an neih theih mai chanchinbu lamin an ring hle.
London club dang Chelsea pawhin Atletico Madrid forward Joao Felix chu loan in an hawh fel mai dawn a ang ta hle.
Kum 23 mi Portugal forward hi Atletico Madrid in chhuahtir an phal a. Mahse Pound maktaduai 113 man a an lei hi tlawm taka hralh an phal bik loh avangin lei mai ngam an awm lo.
Arsenal leh Manchester United te nen pawh a sawizawm Felix hian tun season-ah match 20 atangin goal nga a khung tawh a, midang khung tur vawi thum a siamsak tawh bawk.