Egyptian thuneitute chuan kum sang chuanga upa tawh, Pharoah Rameses II lim, tonne 10 zeta rit ruk tum nia an puh mi pathum a man.
Egypt-a Prosecution Office chuan Thawhlehni khan a ram chhim lam, Aswan khawpui chhim lam lung hmuna kutlawng leh crane-a an lo lai lai a man tih an Facebook page-ah a tar lang.
Persecution pisa chuan heng mite hian milim rit tak leh a bul vela hmanlai thilte chu hai chhuah an tum niin an sawi a. Thil chhui chhung, ni li chhung an kawl phawt dawn tih an sawi a, police-in he an hmalaknaah hian tute nge mi dang inrawlh awm an chhui zui nghal bawk.
Aswan-a Antiquities Authority chuan milim hlu tak leh Rameses II kaihhnawih thil hi tonne 10 vela rit a nih thu an sawi.
An mi mante mobile phone an chhuinaah chuan social messaging app hmanga an thil lai lai video an thawn thu leh an thil laih chu hmanlai milim ni ngeia a lan thu an sawi.
Dynasty 19-na huna mi, Rameses II hi pharoah zingah pawh hriat hlawh ber pawl a ni a, kum 67 zet ro a rel a. Indo mi, pasaltha a nih bakah in a sa nasa a, Egypt-a temple tam tak hi a thupeka sak a ni.
Egypt ram hian an hmanlai thil hlute an hloh nasa hle a, mi mal leh tun hmaa anmahni lo awm tawhtu sorkarin an ruksak nasa thin.
Kum 10 chuang hret liam ta chhungin an ram thil hlu 29,000 vel zet chu dan hmangin an ramah an la kir leh tawh.