Aizawl: Mizoram Rural Bank-in anmahni dawrtute tana internet kaltlanga account khawih chetna tur, Internet Banking Transaction rights facility thar chu Thawhtanni khan V. Siva Kumar, General Manager (RRB), SBI Corporate Center, Mumbai chuan MRB auditorium-ah a hawng.
Samuel L Warbah, General Manager, MRB chuan kaihruai inkhawmah hian Kumar chuan Internet Banking transaction rights facility a hawn zawhah MRB hmasawnna ropui a tih thu leh internet banking transaction facility an nei ta chu a lawmpui thu a sawi a, hmasawn zel turin duhsakna a hlan bawk a ni.
He hunah hian MRB hian Mizoram sorkar hnuaia Information & Communication Technology department hnenah free public wifi dinna turin wifi router 500 a hlan nghal a, sorkar aiawhin Dr. Lalthlamuana, Chief Informatics Officer, Deptt. of ICT-in a dawng.
P. Shimrah, General Manager, Reserve Bank of India, Aizawl leh KVSSLV Prasada Rao, General Manager, NABARD Aizawl te pawhin lawmpuina leh duhsakna thu an sawi bawk a. Saibal Kanti Roy, General Manager, Vigilance-in lawmthu a sawi bawk.