Serie B a khel Parma in Inter Milan lakah hnehna an chang teuh a, a tawpah erawh tang tluan thei lovin 2-1 in Inter in hnehna an chang.
Thawhlehni zana Coppa Italia round of 16 inkhelah champion lai in kum 44 mi ni tawh Italian legend Gianluigi Buffon-a goal a khung turin minute 88 an nghah a ngai.
San Siro a inkhelah Parma in Inter an barakhaih a, minute 38-naah substitute midfielder Stanko Juric chuan goal hmahruai mawi tak maiin a khung a. Inter goal veng Andre Onana tan dan ngaihna a awm lo.
Champion lai hi inkhelah ball chang tam zawk an ni a, mahse goal hlauhawm mumal erawh an siam hleithei lo.
Minute 88-naah striker Lautaro Martinez chuan goal a ‘shot’ an neih hmasak berah a khung a. An si phurh sutin extra time an khelh a ngaih phah.
Extra time second half-ah Inter defender Francesco Acerbi chuan an chakna goal a tauh lut.
Round of 16 lut turin Salernitana leh Bari hnehtu Parma tana khel Buffon-a’n a vawi 50-na atan San Siro-ah inkhel a hmachhawnna a ni bawk.
Inter head coach Simone Inzaghi chuan chakna goal khungtu Acerbi fakin, “Acerbi goal khung a tha tak zet. Centre forward ang maiin a hriam a, kan substitute te zawng zawngin nghawng pawimawh tak inkhelah an nei vek. Inkhel hmabak kan ngah a, a inhnawhkhawm avangin player zawng zawng an pawimawh dawn hle.” tiin a sawi.
“Zaninah first half-ah ball kan chanin han inpek kual dan leh hman tangkai dan kan thiam lova, kan duh anga khelh harsa kan ti. Chawlhlawk hnua khelmual kan luh leh erawhin thil a danglam deuh a, kha aia hma a si phurh sut thei kha kan ni.” a ti.