Rimawi khawvela guitarist huhang ngah leh ropui ber zinga chhal Jeff Beck chu kum 78 mi niin a thi.
British guitar legend hi 1960s chho khan Yardbirds band-ah telin, nasa takin hming a chher chho a, he band-a Eric Clapton hmunruak luahtu ni bawk thihna hian rimawi ngainatute a barakhaih hle.
Heavy metal, jazz-rock leh punk music lo chhuahna leh bul tanna tura an zungkaihna ni hiala sawi Jeff Beck thiamna leh theihna hi sawi hmaih thiang a ni lova, guitar tone mawi lutuk tak mai te kha heng music genre lo pianchhuahna atana pawimawh tawpkhawk a tling pha.
Official twitter page-ah Beck-a thih thu hi tihchian niin, “A chhungte aiawhin rilru hrehawm leh baihvai takin Jeff Beck a boral thu hi kan tarlang,” tih a inziak
A thih chhan dik tak hi bacterial meningitis a kai hnu-ah a ziaawm thei tawh lova, nimin piah khan a thi a ni. He hun harsa leh khirh takah hian an mimal zalenna zahsak hram turin a chhungte’n ngenna an siam bawk.
Jeff Beck hi a vawihnihnan 2009 khan Rock and Roll Hall of Fame-ah lakluh niin, heti ang dinhmun thleng pha leh chuangchhuak thei hi rimawi khawvelah an tam lo hle.