- Ruata
Mahindra company chuan an offroader lar leh hralh kal tak Thar chu khawl thar nen ke hnih phih kal chi, 2 wheel drive model an rawn tichhuak a, he Mahindra Thar thar hi a ke hnung pahnih phih kal a ni dawn a, a hnunglamah differential a awm ang a, 4×4 kan tih, 4 wheel drive system a nei dawn lo a ni.
Mahindra Thar 2WD chhuak thar hian Marrazo tea kan hmuh ang 1.5 litre diesel khawl a hmang ang a, hei hian a lirthei lei leh hralh kawnga GST chawi tur a tihniam dawn a ni. He 1.5 litre diesel khawl hian 6 speed manual gearbox a nei a, power lamah chuan 117bhp pechhuak theiin 300Nm torque a pechhuak thei bawk a ni.
Hei bakah hian petrol khawl lamah chuan Mahindra Thar 4×4 hoa kan hmuh ang 2.0 litre mStallion turbo petrol khawl a hmang dawn thung a. He turbo petrol khawl erawh hi chu torque converter automatic gearbox hmang chauh a ni dawn thung a, mi tam tak manual gearbox hmang duh chuan diesel zawk hi an lei hmel a ni.
Mahindra Thar 4×4 chhuak mek hi kawng chhengchhiaa kal nan 4 wheel drive system tha taka thuam a ni a. Hetihrual hian khawpui chhunga veivah nan chauha hmang leh kawng tha chauha khalh hi a tam zawk an ni a. Offroad adventure lam atana hmang leh a lirthei theihna phawkchhuak tur khawpa khalh leh hmang hi chu mi tlemte chauh an ni. Hei vang tak hian tuna 2 wheel drive system nei Mahindra Thar lo chhuak thar hi kawng harsa leh chhe uchuak ni lemloa khalh tur mi tam takin an lei a rinawm a. Offroad adventure lama tui lem lo, Mahindra Thar mawi tih avanga duh ve te tan phei chuan lei zawk ngei ngei tur model a ni dawn a, a landan a inan reng dawn avangin hman tangkai dan tur azira lei tur zawk thlan thiam a tha viau dawn a. Mahindra Thar lei tum tam takin an bawh dawn ni ngei pawhin a lang a ni.
Rear Wheel Drive Mahindra Thar 2023 hi rawng chi thar Everest White leh Blazing Bronze te duhthlan tur a awm a. 2023 Mahindra Thar 1.5L diesel leh 2.0 turbo petrol 4×2 variant te hi Rs. Nuai 9.99 – 13.49 inkar (ex-showroom) man a ni.
A kentel lamah chuan 2023 Mahindra Thar 4X2/RWD variant hian electrically adjustable ORVMs, touchscreen infotainment system, roof-mounted speakers, cruise control, electronic stability program (ESP) te a nei dawn a. A pawn lamah chuan a hnung leh hmaah sporty black bumper bakah moulded footstep, fog lamp clusters, 18-inch alloy wheel, all-terrain tyre tih te a nei ang a. Heng lo pawh hi kentel a nei nual dawn a ni.
Mahindra chuan Mahindra Thar lian deuh, 5 door version chu kan lo tarlan tawh thin ang khan a tlangzarh leh thuai dawn niin a lang a. Hmun tam taka an enchhinna thlalak leh video te pawh kan lo hmu nual tawh awm e.
Report thenkhat chuan tun thla ni 26-ah tak te hian an phochhuah an beisei a, hetihrual company atangin thu chiang zawk te a lo awm zel turah beisei ila.