Aizawl: MNF Sr Vice President Tawnluia, Deputy Chief Minister chuan nimin khan Mizo Hnam Run, Lunglei chu kum 2023 atan a hawng a. Thu sawiin, Chief Minister Zoramthanga hoin kumin 2023 MLA inthlanpuiah sorkarna an siam leh ngei a rin thu a sawi.
Tawnluia chuan ram leh mi-puite tana thawk turin Pathianin kum 60 zet a hruai tawh, MNF president leh chief minister, Zoramthanga, leadership nei tha, Pathian tihtu zui tur an nei chu lawmna chang hre tur an nih thu a sawi a. “Ama ho ngeiin kumin 2023-ah sorkarna kan siam leh ngei ang tih ring ila, kawng laka hnuchhiah mai turin Pathianin min dah miah lo ang tih i ring tlat ang u,” a ti.
MNF hi mipuite hmakhua ngaia sulsutu, mipui sorkar a nih ang ngeiin mipui nen a inngheng riala an kal a, mipuiin sorkar zar zo a an din khawchhuah zel theih nan ruahmanna an siam tih a sawi a. SEDP hmangin chhungkaw 60,000 bul an tansak mek thu leh, sorkar kum tharah chhungkaw 60,000 aia tam hnenah SEDP hi an pe leh dawn niin a sawi.
Mizo Hnam Run, Lunglei hawnna hi F. Lalsawmkima, Vice President, MNF Sub-Hqrs-in kaihruaiin, Minister Lalrinsanga leh K.Vanlalauva, Treasurer, MNF General Hqrs, Aizawl ten thu an sawi bawk.