Aizawl : Aizawl South III bialtu MLA Prof F Lalnunmawia’n nimin chawhma dar 11 khan Hualngohmun khaw hnuai lei tlahniam hmuna hnathawh mek dan enfiah.
Hualngohmun khawhnuai lei tlahniam hi kum 2006 vel atanga intan tawh niin, lei tlahniam hian a thlanga Aizawl to Lunglei Road kawngpui kal chu a hnawh ping thin a. Hei hi thenfai thin nimahse fur a lo nihin lei hi a che leh thin a. Tunah hian lei tawlh leh che thin ven nan PWD-in Counterfort Retaining Wall siama a kawng chhuat pawh RCC a siam vek an tum a ni.
Bialtu MLA Prof F Lalnunmawia chuan a enkawltu PWD leh contractor te chu lei tlahniamin kawngpui hmangtute harsatna nasa tak a siam thu leh hnathawh theih chhunga zo hman ngei turin a hrilh a. Contractor pawhin thal chhunga zawh hman ngei a tum thu a sawi.
Bialtu MLA hi Aibawk RD Block VC Welfare hruaitu te leh Chhimphei Group YMA hruaitu ten an tawiawm a. He hmun tlawhnaah hian kawng enkawltu PWD Hmuifang Division EE leh thawktute an tel bawk a ni.