Thibaut Courtois chuan Jose Gaya penalty pet tha tawk lo a dansak a. Penalty shootout-ah 4-3 in Valencia lakah hnehna changin Spanish Super Cup final an khel dawn.
Nilaini zanah Saudi Arabia khawpui Riyadh a King Fahd Stadium-ah Super Cup semi-final hi khelh a ni a. 1-1 a team pahnihte an inhnehtawk hnuah Los Blancos in hnehna an chang.
Real Madrid tan striker Karim Benzema chuan first half-ah goal hmahruai a khung a. Eray Comert chuan ti tlu in penalty a chawi a, French striker in a huntha neih a bawhpelh lo.
Nimahsela Los Che lam an ngawi reng lo, inkhel kal zelah kheltha tulh tulhin halftime zawhah Toni Lato cross atangin Samuel Lino chuan goal mawi a pet lut.
Extra-time ah Real Madrid star Vinicius Junior chuan a team a chakpui teuh a, Giorgi Mamardashvili chuan a goal khung ngei tur a lang tawh chu hmun leh hmunah a dansak.
Real tan Benzema, Luka Modric, Toni Kroos leh Marcos Asensio ten penalty an khung vek a, lehlamah Comert leh Gaya ten Valencia tan an khung lo.
Real Madrid inkhel vawi 200 a enkawl zanah manager Carlo Ancelotti chuan an kheltha tawk lo tih a pha lo.
“Inkhel hautak a ni a, mahse hetiang chinah tawh chuan inkhel awlsam a awm lo. First half leh second half tawp lamah kan khelchhe lo, mahse second half tan tirah kan tlahniam hle.” tiin a sawi.
“An fimkhur a, min nawr leh thut an tum ran. Chuvangin kan result a lawmawm. Kan that ber lai a ni lova, mahse zawi zawi in hma kan sawn zel ang.” a ti bawk.
Real Madrid hian Pathianni zana final khelh tura nizana Real Betis leh Barcelona inkhel a chak zawk an hmuak.