Southampton manager Nathan Jones chuan club a enkawl hnua a result ropui ber a nei a. English champion ni lai Manchester City chu English Football League Cup-ah hnehin semi-final an inhlangkai.
Kum 49 mi Jones hian November 10 khan Luton Town atangin Saints hi a zawm a. Club lian enkawlna hnuhma a la neih mang loh avangin Saints fan te rin a la hlawh lo.
Nimahsela Nilaini zan inkhel result avang erawhin lawm a hlawh sawt a rinawm viau a, league lamah che tha lo mahse cup lama a chetthat theih chu a chhunzawm.
Inkhel chu
Manchester City manager Pep Guardiola chuan tun kartawp a Manchester derby an khelh tur thlirlawkin a star player a chawlh hahdam tirte zingah Erling Haaland leh Kevin de Bruyne te an tel a. Amaherawhchu hei hian Saints tan thil a ti awlsam chuang lo.
Southampton in first half-ah fak phu takin goal hnih an khung a. Minute 23-naah Sekou Mara chuan goal hmaah a hriam tih lantirin goal tha a khung a. Minute nga hnu lekah Moussa Djenepo chuan an goal hnihna mawi takin a khung. City keeper Stefan Ortega a che hman lo hrim hrim.
Second half-ah Guardiola in a ralthuam tha te Haaland leh De Bruyne dah lut mahse awmzia a nei lo. Saints in huaisen leh tum nei ran tawhin goal an khung a. Semi-final ah Newcastle United nen an inkhel ang.
“Mahni inthununna, inpekna leh huaisenna hmangin kan hlawhtling. Kan tactic thlakte kan ti fuh a, huntawp thleng tang tluan turin kan tha a za hle. A tawp thleng khan kan inveng a ni lo, kan hlauhawm ve reng tho a ni.” tiin Jones chuan an inkhel a thlirlet.
Inkhel dangah Nottingham Forest in penalty hmangin Wolverhampton Wanderers 4-3 in an hneh a. Hun pangngaiah 1-1 a an inhnehtawk hnuah kum 31 chhunga a vawikhatna atan EFL Cup semi-final an khel ang.
Semi-final ah hian Manchester United nen an inhmachhawn leh dawn.