NBA regular season kal mek a record nei tha ber Boston Celtics chu vung takin an kal chhunzawm zel a. Ningani zingah New Orleans Pelicans 125-114 a hnehin a zawna vawi li nan hnehna an chang.
Celtics tan hian an star player pahnihte an che tha leh a. A bikin tun tumah Jaylen Brown langsar in tun season a inkhel pakhat a point a score hnem ber tum a hmang a, point 41 a score.
Brown hian rebound vawi 12 la bawkin NBA a point 40 a score tlin vawi nga na a ni.
A teammate Jayson Tatum nen tunlai NBA a player pahnih inkawp hlauhawm ber an nihna an lantir a, ani hian point 31 score in rebound 10 a la a. NBA-ah an pahnih a inkawpin point 70 aia tam an score tlin vawi 10-na a ni bawk.
“Tun hi kan that ber lai a ni in ka la hre lo. Kan hmalam hunah hei aia tha zawk leh hmasawn theihna tur kan la awm a, hmabak kan la nei ve ve in ka hria. Tun hi chu a zinkawng chauh a la ni.” tiin Brown chuan inkhel zawhah a sawi.
Celtics tan Malcolm Brogdon chuan point 20 a score a, 3 points vawi li lut Al Horford-a’n 14 a thawh.
New Orleans tan CJ McCollum chuan point 38 a score a. A zawnin match nga point 25 aia tam a score na a ni.
Hetihlai hian he inkhelah hian an star player beiseiawm Zion Williamson chu inhliam avangin a khel lova, a zawnin match nga a inkhel lo tawh.