Alabama, Unites States-a tornado thawk avangin mi paruk vel an thi niin tual chhung thuneituten an sawi a, ‘ruang an la zawng mek’ tih an sawi bawk.
National Weather Services (NWS) chuan Ningani ringawtah khan US chhim lam state-ah hian tornado 35 chuang a thawk tih an sawi a, mi maktaduai 35 vel zet dunhmun derthawngah an awm phah.
‘Tornado lian leh hlauhawm tak thawkin’ Selma, Alabama-ah chhiatna nasa tak a thlen tih an sawi bawk.
Tornado thawk avang hian state palia chhungkaw sang tel in êng an neih loh phah.
Poweroutages.us-in a tar lan dan chuan Ningani zan (India-a Zirtawpni chawhma) thleng khan Alabama, Georgia, Tennessee leh Carolina-a chhungkaw 1,47,000 chuangin power supply an la nei lo.
Khaw awm dan nuam lo tak hi zan lam (India-a Zirtawpni tlai)-ah pawh a la chhunzawm hmel tih sawi lawk a ni.
Alabama-a tornado thawk avanga thite hi Autauga County-a mite vek an ni a, Montgomery leh Selma inkar, state lailia mite an ni hlawm.
“Thi eng emaw zat kan nei a, ruangte kan la zawng mek,” tiin Autauga County Coroner Buster Barber chuan CNN hnenah a sawi.
Birmingham-a NWS pisa chuan Ningani chhun dar 12:53 (India-a Zirtawpni zing dar 12:23)-ah Autauga County tan hian ‘tornado emergency’ a tichhuak.
NWS-in radar-a an en dan chuan thil a len chhiat themte chu thlipui hian feet 20,000 zeta sangah te a vawrh kâng nual.
Alabama leh Georgia governor-te chuan emergency an puang ve ve.Online-a video darhah chuan thlipui chak tak avang hian Georgia leh Mississippi-ah thil leh in ding tam tak a chhe bawk tih a lang.
US Civil Rights Movement avanga hriat hlawh, Selma-ah hian mihring thi an awm lo va; mahse, khaw var hma zawng curfew puan a ni.
Alabama-ah hian vur tlak theihna khawpa khaw vawt tura sawi lawk zui niin Zirtawpni chawhnu (India-a Inrinni chawhnu)-ah chuan a tlak rin a ni.
Hetih lai hian US-ah tho hian khawchhak lama California pawhin ruah tam tak a dawn avangin an buai hle a. Tui a lian a, lei min leh tawlh a tam a, power supply a khaihlak nasa hle bawk a; mi 18 vel lai thi an awm tawh.
Ningania ruah leh thlipui thawk a zia hret hnuah California thuneitute chuan kar tawpah a thawk leh dawn tih an sawi lawk leh tawh a ni.