Chief Election Commissioner of India Rajiv Shukla chuan Election Commission of India (ECI)-in Tripura-ah inthlanna felfai leh thianghlim, zalen taka mipuiin vote an thlak theihna tur siam turin theihtawp a chhuah tih a sawi.
Mi 15 awmna ECI team chuan Nilaini khan Agartala thlengin muanawm taka inthlan a niha voter-ten mipui rorelna kûtpui chu an zawm theuh theih nan a tul ang zawng zawng an ti dawn tih Shukla chuan Ningani khan a sawi.
Voter-te chu miin an duhthlan tidanglam tura an vau emaw, an thlem emaw a nih chuan cVigil app hmangin inthlan thuneitute hnenah an thlen thei tih a sawi bawk.
“Niminah kan lo thleng a. Politician, dan kengkawhtu, police leh district magistrate te nen kan inkawm tawh a. Inthlanna zalen, dik, felfai, tharum thawhna leh buaina dang awm lo buatsaih turin kan inruahman a, thawhhona tha kan mamawh. Bial 60 inthlan turah 30 chu general a ni a, bial 10 chu Scheduled Caste leh bial 20 chu Scheduled Tribe tan hauh a ni a. Vote nei mi 28,13,478 awmin heng zinga mi 65,000 chu a vawi khat nana vote thlak tur an ni,” a ti.
Tripura assembly inthlan turah hian polling station 3,328 awmin thingtlangah 2,621 leh khawpuiah 707 a ni ang.
CEC Shukla chuan tun inthlan lo awm turah hian polling station 60-ah chuan hmeichhia chauh an duty dawn tih a sawi a, hengah hian presiding officer, polling officer leh venhim hna thawktute pawh hmeichhia vek an ni dawn tih a sawi.
“Polling station 10-ah chuan pianphunga rualbanlo chauh an duty dawn bawk a. Hei hi anmahni zahna leh chawikanna atana ruahman a ni,” a ti.