China ramah thla khat awrh lek chhungin Covid kaihhnawiha thi mi 60,000 dawn an awm hman a. Hei hi zero-Covid policy a kalpui a tihtawp hnua mumal taka an dinhmun a puan hmasak berna a ni.
China-ah hian damdawi in leh invuina hmunte a lun em em lai leha coronavirus avanga thi zat a puan that duh loh avang leh a puan chin pawh a tlem theih em avanga sawi hlawh mek a ni.
Thuneitute chuan December 8 leh January 12 inkarah khan mi 59,938-in Covid kaihhnawihah nunna an chân tih an puang ta a ni.
Thi zinga a tam zawk hi kum 80 chung lam, taksa chak lo sate an ni.
Thi zinga mi 5,503 hi natna hrikin a tihbuai avanga thawkna lama harsatna nei an ni a, mi 54,435 chu taksa chak lo sa, hri an kai bawk si avanga thihpui zui ta an ni hlawm.
China-in Covid vanga thi a puan hi a tak takah chuan hei aia tam zawk daih an nih rin a la ni tho va, thuneitute hian damdawi ina thite chauh an chhinchhiah a ni.
Thuneitute chuan Covid vanga na zual, damdawi in panpui ngai an tam zual lai hi January thla tir kha a nih thu an sawi a, tunah pawh damdawi ina enkawl ngai an la tam viau tho.
Thingtlang lama thil awm dan an vil chhunzawm zel dawn tih an sawi a, hri kai leh kai avanga buaite chu a rang thei ang bera hmuh chhuah zung zung bakah dinhmun derthawng zualte enkawl thuai thuai chu an ngaih pawimawh a nih thu an sawi.