Geology & mining (G&M) Department-in nikum (2022) chhung khan chhiah leh fee hrang hrang an lak atangin Rs 10,51,08,411 an hmu a, sorkar sum bawmah an chhunglut.
The Zozam Times zawhna chhanga G&M Department Director Lalthazuala’n a sawi danin, nikum chhung khan lung lakna atangin Rs 8,60,44,631 an hmu a, balu lakna atangin Rs 62,11,780 leh ONGC leh Oil India atangin petroleum exploration licence Rs 1,28,52,000 an hmu.
G&M Department hian 2022 chhung khan lung lak phalna (mining permit) 89 an pe chhuak a, mining permit thar thawh 351 an an awm bawk a, G&M hian check gate nghet 10 leh a tul anga sawn kual thin 13 an nei.
Zawhna chhangin G&M Director Lalthazuala chuan a kum telin chhiah leh fee atanga an sum hmuh chu a pung ve zel tih a sawi.
An department-ah thawktu indaih lohna a nasat thu leh tunah hian regular staff 50 vel an awm mek a, a nghet loa thawk, provisional employee 21 leh check gate-a regular staff puitu local labour mi 27 an chhawr mek thu a sawi.
Sorkarin an department-a post ruakte hnawh khat tura hma a lak mek thu leh gazetted officer paruk lak a phalsak tawh bakah staff dang lak tharna tur pawh a ngaihtuahsak mek tih a sawi bawk a ni.