Min belh duhtute chu kan pawm mai dawn lo em ni?
Thenawm state te nen ramri buai kan nei fo a, a bik takin Assam nen buaina kan nei nasa in, thisen hial a lo chhuak tawh a nih kha. Ram hruaitu leh thil titheitute ber an paukhauh loh chuan hmasawn a har viau thin. Chinfel harsa tak niin lang tawh mah se, kawng kan zawng a nih chuan engemaw zawng talin a lo awm leh thin tih pawh kan hriat tel thin a tha fo.
Mizo mipuiten nawr chhuah leh tihtawp tumin hnam thenkhat nawr mah ila, vawiin thlengin a harsatzia a lang telh telh a, hmasawn a har viau. A ramchhunga chengte ngei ngei pawhin kan inlungrual loh phah fo zel chu a nih hi. Hetiang kan nih lai hian kan rama awm leh beh duh ngawih ngawih kan unaute an la awm a, anni chuan kan thlazar hnuaia awm a, an luah chin chhuahsan si lo a, belh reng min duh thu an sawichhuak ta hial. Hengte hi ngaihven a, lawm taka dawm thiam a va hun em.
Thangram Indegenous People’s Movement (TIPM) chuan Thangram chhunga chengte hi Mizo hnahthlak heng – Hrangkhol, Chorei, Ranglong, Molsom, Kaipeng leh Sakachep te an nih thu leh British lo luh hma daih tawha lo awm tawh an nih thu sawiin, “Pi pute huna rorelna pakhat hnuaia awm thin chu rorelna fel lo avangin then hranin kan awm a,” tiin, an duh ber chu Thangrama Mizo awmte hian an unau thisen zawmpuite nena Mizoram chhung rorelna khat hnuaia awm leh a nih thu an sawichhuak ta hial.
Heng TIPM hruaitute hi hun rei tak chhung Aizawlah awm tawhin, mi chi hrang hrang an kawm kual a, MZP te chu belh berah an rawn nei thin bawk. An hmalakna a hlawhtlin theih nan theihtawp chhuah zel an tum bawk a, mi pawimawh hrang hrang an hmu tawh thin bawk. Heng min belh duh ngawih ngawihte hi chu sorkar pawh hian kuahkhawm dan zawng thei se a va tha em.