Aizawl: Land Revenue & Settlement Minister Lalruatkima chuan khawvel sik leh sa dinhmun tlahniam zel ven kawngah mahni phak tawk theuhah tan lak a tul tawh thu a sawi.
Inrinnia Food Corporation of India-in an dincham vawi 59-na lawmna puala FCI kudam tual, Tanhril-a thingpui in rûnpui an buatsaih a hmanpuinaah thing phun hi sik leh sa, environment chhe zel tur venna atan a tangkai hle tih a sawi a. “Sik leh sa dinhmun tlahniam zel hi mi thiamten an vei a, khawvel huapin tan an la a, keini chuan kan la hrethiamin kan la vei lutuk lo niin a lang a, hian kan phak tawkah tan kan lo lak ve a tul tawh hle a, mipuite zirtirtu-ah kan tan a ngai takzet tawh,” a ti.
FCI, Divisional Office Aizawl mawhphurhna la mektu, Zodinpuii Ralte chuan AAY leh PHH beneficiary-te tan buhfai a thlawnin a sem turah retailer-ten an sem tan mek, Grade A chu fortified rice-a thlak tura ruahmanna kalpui mek a nih thu sawiin hei hi ei atan a hlauhawm loh thu leh iron, folic acid leh vitamin B-12 a tel avangin a tha hle zawk niin a sawi.
FCI hian Mizoram pumah Food Storage Depot (FSD) paruk nei mekin pahnih dang reilo tea sak zawh an beisei.