Aizawl: School Education department-in thlakip chhuak chanchinbu a tihchhuah, ‘Meichher’-a thu leh hla thawh thate chawimawina chu nimin khan sem a ni a. Nikum chhunga article tha berah ‘Aia Upa zah,’ T.C. Jonunsânga, Lunglei Vênglai ziak chu thlan a ni.
Article tha pahnihnaah ‘Tuiah tui namên ka dâwn lo ve,’ J.H. Ngûrzâmpuia, Bethlehem Vêng, Aizâwl ziak chu thlan a ni a, ‘Mizo tawng mawina leh danglam bîkna,’ Zalianthanga, Tahan, Myanmar ziak chu pathumna a ni thung.
Nikum chhunga Mechher chanchinbua thu thawh tam ber chu article pasarih thawhtu, Ramhluna Hnamtê, Luangmual, Aizâwl a ni a. Pahnihna, article pali thawhtu, Familia Fânai Laltansânga, Zotlâng, Lunglei niin, pathumna article pathum thawhtu – R. Lalrâwna, Electric Vêng, Aizâwl; B. Lalthangliana, Chhînga Vêng, Aizâwl; Zirsângkima, Thuampui Vêng, Aizâwl leh Mahmuaka Chhakchhuak, Chanmari, Aizâwl te an ni.
Ziakmite hlutzia leh chawimawi an phuzia tar lan chu Meichher chanchinbua thu leh hla thawhhlâwk chawimawina buatsaih chhan ber a nih thu School Education department hotute chuan an sawi a. Meichher chu a tîrah ‘Zoram Êng’ tia tihchhuah niin, kum 1975 March-April chhuak chu a bultanna a ni a; kum 1975 vek October atangin ‘Meichher’ tia a hming thlâk niin, hei hi tun thlenga hman zui a ni ta a ni.