- H. Lalroluahpuia
Jabeza chuan, “Aw, mal mi sâwm ngei ngei la, ka ramri hi mi zauh la, i kut chuan mi awmpuiin lungngaihna ka chungah a thlen loh nân sual lak ata mi thiar fihlim ang che,” tiin Israelte Pathian chu a au va. Tichuan Pathianin a thil dil chu a hlawhtlintîr a.”
(1 Chronicles 4:10)
Pathianin min khawngaih a, kum thar duhawm tak kan lo thleng leh ta reng mai. Pathian malsâwm hi kan va han ni bîk tehlul êm! Min hruaitu Pathian hnênah lâwmthu sawi ila; Lalpa chu fakin awm rawh se! He hun thar hi kan zavaia tâna kum hlu leh hriatreng tlâk, kum malsâwm a lo nih ngei theihna tûrin Pathian duhzâwnga tawngtaina nên bul tan thar leh theuh ila. Seng khâwm hna thawk tûr mi dang an awm chuang lova, remna siamtu nihlawhna hi kan chanvo a nih angin, hmangaihna nên inpumkhatna rawngbâwl hna thawk ila. Pathian hnên ata lâwmman tha ber chang tûrin tiam chin lam chu i pan zêl ang u.
Mihringte hi hmasâwn tûra siam kan ni. Pathian hi tih tawh lam chauh thlîr thîn ni se la chu, mihring nunah hian hmasâwnna a awm ngai lo vang a; than duhna leh tumna pawh kan nei kher lo vang. Rahbi thar duhawm zâwk kai tûr leh kan nun hluia kan tihsual tawhte thil tha zâwka thlâkthlengna remchâng kan neih theih nân he hun thar hi Pathian duhsakna avânga pêk kan ni. Chutiang chuan kan tum ber chu hmasâwn a, hlawhtlin a ni a; chu nun siamtu chuan kan hma huna kan tih tûrte hi nghâkhlel takin a lo thlir ve rêng a ni. Kan tuh bâk seng tûr kan nei ngai dâwn lo a ni tih erawh kan hriat thar fo a tha ang.
Hun liam hnu chhuangtute’n Pathian lung an ti-awi zo ngai dâwn lo. Hei hi mi sual ber atanga mi tha zâwk nia inngaite thlenga kan vânneihna a ni. He khawvêl leh chatuan thleng pawha nun duhawm leh malsâwm nei tûrin bultanna tha siam thar leh theuh ila. Kan lo dai sual tawhte hriatsak reng kan ni dâwn lo chauh ni lovin hunin a liampui tâk kan thil tha tih tawhte ngei pawh khân min chhandam ngawt dâwn lo. Kan hma hun engkim tâna kori tu tûr zâwk chu he hun thar hi a ni.
Kan nun hlui avânga beidawng mai tûr kan ni lo. Hlimin lâwm phawt ila, beiseina thar leh ngaihtuahna tharte nên hmalam pan zâwk tûr kan ni. Kan hlimna tûr atâna mawhphurtu chu keimahni chauh hi kan ni a; a tha thei ang bera nun hmang zêlin; tauhna leh vuivaina te bânsanin, a êng zâwnga thlir thiamna neih tum tlat ila, hmasâwnna kawngah thui tak min hruai ngei ang.
Ringtute hi siam kan nihna Kristaah chauh zâwk thil tha ti thei niin; sual kalsana keimahni leh mi dangte tâna malsâwmna ni tûra buatsaih lâwk kan ni reng a. Krista nî thlenga tihfamkim kan nih theihna tûra hna tha thawk zêl tûr kan ni. Pathianin mawhphurhna min pêkte hlen chhuak tûrin theihna min pe thîn bawk, a fa duh takte kan ni rêng a.
Sumin a lei phâk loh chawlhna leh zahawmna te hmu tûrin kan nihna dik tak hi kan hre tûr a ni a; kan lungawipuiin kan hmingthatpui ber tûr a ni. Kan tumna leh duhna rilru a dik a, kan thlen tumna hmun a dik a, kan kawng zawh a sual loh chuan kan hlawhchham ngai lo vang. Dikna hi hnehtu a ni a, hlawhtlinna hi rim taka thawkte chanvo a ni. Pathian tihna avânga khawvêl mite anga ti ve lo kan ni tûr a ni a. Kan neih loh avânga tap mai lovin kan neihte avâng zâwka Pathian hnêna lâwmthu sawi thîn tûr kan ni ang.
Kan lama tang Pathianin hnehtu ni tûrin min din a. Hrehawmna lo thleng thînte hian mamawhtute phatsanna remchâng min pe lo va. Mi, an dinhmun leh nih mêkna atanga rahbi thar kaitîr hi hnehtute chanvo niin, thilsiam dangte tâna Pathian hmanrua ni tûr kan ni bawk.
Pathian hi amah hmangaihtute thatna tûra engkima hna tha thawk thîn a ni. Tisa leh thlarauvah kan mamawh ang tak malsâwmna thar kan chan theih nân nun leh thiltiha amah hmangaih bertu kan nih a ngai a. Kan nun hruaitu lo ni zêl se; Pathian leh a thute hi hriat fiaha rin chauh tûr ni lovin rinnaa fiah zâwk tûr a ni ang; ani chu a rinawm a. Pathian hmangaih bertute’n an tisual ngai lo!
Jabeza chu Pathian hnênah malsâwmna dilin a tawngtai a; a hun lai khawvêla thil tha ber ber a dil a ni (I Chro. 4:10). ‘Pathian duhzâwnga tawngtaina’ tiin sawi a ni thîn, lei lama nihlawhnaah tâwp mai lovin sual lak ata chhandamna (fihlim) a dil a ni. Pathian a lungawi a, tawngtaina hlawhtling kan hmu ta! Kum 2023-ah hian Pathian duhzâwnga tawngtaina nên nun duhawm zâwk, malsâwm leh hlawhtling kan lo neih thar leh theuh theih nân min hruaitu Krista lo ni zêl rawh se…