Italy-a sorkar mi man duh ber, most wanted rei tak lo ni tawh, mafia boss Matteo Messina Denaro chu man a nih hnuah a birukna thin hmun dang pakhat an hai chhuak leh ta.
Messina Denaro-a birukna thin an hai chhuah thar leh hi Sicily-a Campobello di Mazara khuaa a hmaa an lo hmuh chhuah tawhna atanga metre 300 vel chauhva hlaah a nih thu Italian police-te chuan an sawi.
A tawmna hmun hi thawmhnaw bawm (wardrobe) phena chhuat tawlh thei chhungah a ni.
Messina Denaro-a hi Thawhlehni khan Sicily khawpui, Palermo-a mi mal damdawi inah man a ni a. Man a nih hma hian police-in kum 30 zet man tumin an lo um zui tawh a ni.
Damdawi inah hian hming dik lo hmangin a awm a, a cancer inenkawl lai mek a ni.
A hming atana a hman, Andrea Bonafede tih chu police-in an ringhlel a, he hming hi mafia boss thi tawh, Leonardo Bonafede unau fa hming thin a ni.
Phone-a an chhuinaah kum 2020 leh 2021 khan Bonafede hi Palermo-ah a awm lo tih an hria a, hetih lai hian a hmingpu chu damdawi inah inzaiin a awm si a ni.
Mafia pawl pakhat, Cosa Nostra hotu ber a nih laiin Messina Denaro hian dan bawhchhiatna tam tak a nei a. Mi a bùm a, dan lovin bawlhhlawh sawngbawlna a siam a, pawisa a chheprel a, ruihhlo a tawlh bawk nia puh a ni.Kum 2002 khan amah awm lo mah se tualthahna thubuai eng emaw zatah thiam loh chantir a ni.
Man a nih hnuah hian a lo khawsak dan thin hrang hrang hai chhuah leh hriat belh mek zel a ni.
Palermo atanga km 116-a hla, a pianna, Castelvetrano atanga km 8 chauhva hla ni bawk, Campobello di Mazara-a in biru takah a cheng thin tih hriat a ni.
A thenawma cheng chuan an inhmuh fo thu leh chibai pawh an inbuk fo thin thu a sawi.
A birukna thin an hai chhuah hmasakah chuan ralthuam engmah hmuh tur a awm lo tih police chuan an sawi a. Perfume, in chhung bungrua leh thawmhnaw man to tak tak, designer larte duan erawh a awm teuh tih an sawi.