Thenzawl Zone Football Association buatsaih Zone Championship Football Tournament 2023 chu Zirtawpni khan Thenzawl Loṭhazawl Football Ground-ah PTS Principal HL. Thangzuala’n a hawng.
TZFA hnuaiah Thenzawl khawpui chhung bakah Neihloh, Buangpui, Kangmun South leh Zote South khua atangin football club 16 an tel a. Ruahman angin Zone Championship Final hi Republic Day, January 26-ah khelh a ni ang.
Knockout tournament a nih avangin TZFA Zone Championship hian ngaihhlut a hlawh hle.
Khuallian PTS Principal HL Thangzuala chuan ram changkang tehna pawimawh pakhat chu infiamna a ni a. Mizoram state, Serchhip District, Thenzawl leh a chhehvel khua chu India ram leh khawvel hriat ni turin thildang zawng aiin football leh infiamna dang a tan lak thar a pawimawh nia a hriat thu a sawi.