Aizawl: Ni hnih awh tur Pawl Kut chu nimin khan Aizawla Sipai Lammual-ah hman tan a ni a, a tan niah hian Social Welfare Minister Er Lalrinawma Kut Pa a ni.
Kut pa chuan Mizoram sorkarin Mizo hnam chin dan leh ziarangte khawvel huapa pho chhuak tura tan a lak zel tur thu a sawi a. Sorkarin Zofate inpumkhat zelna tur leh Zo hnam nun leh zia humhalh kawngah theihtawpa hma a lak zel tur thu sawiin, India ram bakah khawvel huapa Zo hnam chin dan leh zia te pho chhuak zel tura tan a lak zel tur thu a sawi.
Pawl Kut hman chhan sawiin, Kut pa chuan khawvel thang zel leh hmasawnna chak taka kal mekin Mizo hnam nun leh ze mawi tak a pawlh dal tial tial emaw tih theih a nih avangin thangthar ten a tak taka mit ngeia an hmuha, an vawn chhunzawm theihna tura buatsaih a nih thu a sawi.
Social Welfare & Tribal Affairs department bultuma, Art & Culture, Tourism leh School Education department te nen thawkhova buatsaih Pawl Kut hi vawiinah hman chhunzawm a ni dawn a. Nimin khan Middle school leh High school zirlaite pualin Mizo infiamna leh chheihlama inelna buatsaih a ni a, Middle school zirlai mipate tan Sakuhuilut, inarpathai leh tawlailir intlansiak hmanga inelna buatsaih niin, hmeichhe tan zawnga leihlawn dim dim, ketaminu tlan leh invawr hmanga inelna buatsaih a nih bakah High school zirlai mipate tan insuknawr, inarpasual leh kalchhet hmanga inkalsiakte buaitsaih niin, hmeichhiate tan ketaminu tlan, kawikah leh tuium khirha tui chawi hmanga inelna te buatsaih a ni bawk.