- Mahmuaka Chhakchhuak
Mi tam takte chuan kumthar hi sorkar thar kan neih hun tur tiin an nghahhlel viau nite hian a hriat a, a dik e, a dik lo e tih phei zawng hre lo mah ila, kum thar, 2023-ah hian sorkar thar nei turin Inthlanpui kan hmachhawn hmel si a, chutah chuan sorkar thar hlak a piang dawn emaw sorkar ngai bawk hrawn leh dawn pawh ni ila sorkar thar chu kan nei hrim hrim dawn a nih hmel a. Sorkar inthlak avanga mize danglam nghal ve mai hi mi tam tak kan lo awm bawk thin avangin sorkar thar kan nei tur pawh hi ngahhlelhawm tak a nih theihna lai a awm bawk ang a, chutih rualin mi thenkhatte tan erawh thil huphurhawm tak a ni bawk thei ang.
A bik takin thalai zingah ram inrelbawl dan ngaihven an pung sawt hle a, chung zinga thenkhatte phei chu thil dang sawipui theih loh khawpin ram hi an vei takzet ni te pawhin a hriat. An demawm hauh loh a, ram hi vei tur a ni a, ram kan vei rual erawh chuan Party Politics erawh kan dah lian palh ang tih chu hlauhawm tak a ni thei bawk ang a, chumi tur chuan kan inven that hle pawh a ngai thei. Kum tam tak kal tawh atang khan kan ramah hian ram vei mi tak tak hi kan lo awm tawh thin a, ram vei avanga Party Politics-a lut ta hi sawi tur tam tak an lo awm tawh thin. Party-a luh kha a tha e, a tha lo e tihna erawh a ni kher chuang lo a, lut lo pawha ram vei tak tak pawh hi an awm tho a, tun dinhmunah chuan Party-a lut loa ram vei chu sawi tham an awm meuh awm lo e. Ram vei avanga Party-a lut a, Party boruakin a chiah zawp a, a lem zawh tak hi chhiar tham fe an lo awm tawh a, an luh hmaa tha tak leh anmahnia beiseina sang tak kan neih thinte khan Party Politics Platform-a thu an han sawi leh hi chuan an tawngkam bungraw hman alo danglam deuh thin tawh bawk si avangin anmahni kan hmuh leh beisei dan lo danglam ta hi an hming lam rik tur kan hre nual mai thei e.
Ram vei avanga Political Party-a lut kher loa pawl ding pawh hi chhiar tham fe anlo awm tawh a, chungte chuan an din tirh lamah chuan vung an han chhuah hluai a, a rei telh telh a, an zuih telh telh emaw tih mai tur an ni ta zel mai thin hi eng emaw a chhan ni ber thin ang tih hi ngaihtuah tham tak a ni. A thente chuan Sorkar kallaite an han bei chiam thin a, huai tak taka thil an tih lai han hmuh hi chuan mipui beisei leh rinna pawh an hlawh viau thin. Nimahsela rin loh lamah hian an do fuh tak tak loin an do pial nge kan tih ang a, an do ber-ate nen hian an nui ho leh mai mai thin em ni aw ni te hian a hriat leh thin a. Kum sawmhnih, ni lo kum sawm thum kal ta vel atanga sorkar bei zawng leh sawisel zawnga pawl lo ding tam takte kha tunah chuan an awm ta meuh lo chu a nih hi maw le. Chungte chu lem zawhin an awm ta nge, an tiahvai zo ni zawk ang tih lah hriat chian hleihtheih an ni lo fo a, vawiin thleng pawha hetiang pawl rawn la ding thar hi kan la awm zauh zauh thin bawk tak nain kal hmasate hnung an zui ang ngem, zui lo ang ngem tih hi zawhna lian tak alo awm phah ta chu a ni.
Tin, Social media lama kan insawiselna leh insawichhiatna zawng zawngte hi a tam zawk hi chu a nih tur bak baka insawiselna huanga dah chi niin a hriat. Ram hruaitu tuin emaw thil a tihsual (hre reng chunga a tihsual emaw a tihsual palh) in keini chuan a thil tihsual sawi chu duhtawk mai loin an mimal nun leh an chhungkaw lam thleng thlengin kan han sawi ta vak mai thin hi tu tan nge maw tangkaina awm thin ang le aw. A awmna Party kan han chirhtheh zui chiam bawk a, Archuk tuilo khawpa tawngkam na tak tak nena kan han chuk rawn takah chuan an chhung hnaite tan pawha kimkit leh hrehawm tih vanga khaw eng hmuh ngam lohna khawp hial tur a ni fo thin. Chutiang chuan rah tha a chhuah ngai reng reng lo a, mi thinlung kan hliam mai mai zawk tih hi Social media hmang tangkai tam takte hian hre mawlh rawh se. Thinlung hliam hi dam har tak a ni a, phuba lak chakna thinlung a neih tir thuai bawk avangin a rah a tha ngai mawlh lo a ni.
Kum thar, 2023 June thla vel atang phei chuan Social media lamah Pathianthu aiin Politics lam thu a tam ngei tawh tura rin a ni a, chutiang bawkin titina hmunah reng reng pawh Politics lam hawi titi a tam ber pawh a rinawm tawh. Chutiang hunah chuan Party awn lam nei lo, neutral tam takte hmin turin Party worker-te chuan tlang hrang hrangah Aurinna nen kalin hmuntin an rawn fang ang a, tawngkam thiam tak tak nen kan tapchhak zawlah min rawn lenchilh leh ngei ang. Thil tha tak tak pawh min la rawn tiam leh mai thei bawk a, sum leh pai phawrh hreh lo tak tak pawh kan hmachhawn ngei bawkin a rinawm a, chutiang lakah chuan fimkhur taka kan awm a pawimawh a ni. A thawm ring ring hi tha tura ngaihna neih pawh awl tak tur a ni a. Damlo kan an taihmak viau avanga ram hruaitu atana tha an nih tihna pawh a ni chuang lo a, mitthi ral an peih viau avanga ram hruaitu tha tura ngaih ngawtna thinlung pawh neih tur a ni chuang hek lo.
Kum 1972 atanga mahnia ram roreltu kan neih tan atang khan kan ramah hian ram roreltute hian mipui thluak an suk thiam zia hi kan lo hre tawhin a rinawm. Kan Politician hmasate zinga thenkhatte kha chuan lemchan pawh an thiam viau thin a nih kha. Vawiin thleng hian chutiang mi chu kan Politician zingah an la awm reng tih hi mipuite hian kan hriat a, chung mite buma kan awm lohna tura fimkhur taka kan awm a ngai a ni. Chuvangin thenkhatte’n kum thar hi an kum that kum atante lo puangin Politics-a an tluan kum tur atan lo ngai mahsela keini chuan kan vote khat hmang lek hian ram siamthatna turin hna kan thawk thei a ni tih hi kan theihnghilh lo a tha. Chumi tur chuan chhungkaw tinte hian ram hi kan thlir a hun takzet ta a, ram kalphung hi kan sawi tam a ngai tawh bawk a ni.