Khelmual pawn lama an boruak avangin tunhnaiah chanchinthar an ngah hle a, khelmualah erawh tunhnaia an insiamthatna lang zelin tlawm thei dinhmun a an din hnuah Juventus leh Atalanta 3-3 in an inhnehtawk.
Juventus hi Italy a football lam thuneituten an sum chungchanga thubuai an neih an chhuinaah an thil kalpui dan a fel lova, hei vang hian hrem niin point 15 paihsak an ni.
Table laihawla an tlak thlak hnuah a vawikhatna atan inkhel an hmachhawn a. Allianz Stadium a team pahnih inkhel a hmuhnawm.
Mikhualte hi attacking football hlauhawm khel thin an ni a, forward Ademola Lookman chuan minute nga chhungin goal a khung nghal.
Hei hi Juve in Angel Di Maria penalty hmangin an sut a, Arkadiusz Milik chuan goal mawi khungin hma an hruai zui.
Mahse Atalanta in second half tan hnu lawkah goal an khung ve leh a, Joakim Maehle chuan an si phurh a sut hnuah Lookman bawkin an goal thumna a khung a. Freekick atang Danilo chuan Juve si phurh a sut ve leh a ni.
Juve coach Massimiliano Allegri chuan, “Kan hna pawimawh ber kan thawh chhunzawm a ngai. Mahse player te rilru paukhauhna a fakawm hle. Pahnihna atanga 10-na a tlak in rilru a nghawng pha hle ang.” a ti.