Aizawl: Mizoram Police thu chhuah chuan tun laia mobile phone ruk leh hralh chhawn hluar zel tur venna atan te, mipuite himna tur leh dan kengkawhtute tana awlsam zawkna turin Department of Telecommunication, Govt. of India chuan IMEI data hmanga phone chhuina, Central Equipment Identity Registry (CEIR) dinin, Mizoramah pawh hman theih turin ruahman a nih tawh thu a tar lang.
An tar lan danin, CEIR hi network operator hrang hrangte data khaikhawmtu niin network pakhatin a blacklist tawh chuan network dang SIM Card pawh vuah se IMEI hmangin hman theih loha siam (block) leh chhui (track) theihna a ni.
Mi sualin mi mobile phone an lo ru emaw, tihbo palh emaw a nih chuan block turin online-in ceir.gov.in-ah a request thei a. Police Station-ah pawh CEIR hmanga block turin a ngen theih bawk.
Hemi hnu hian heng phone bo hi hman tum an awm chuan CEIR hmang hian police-ten a phone awmna nen an chhui chhuak thei (location tracking) a ni.
Mizoram Police chuan Central Equipment Identity Registry (CEIR) hi hmang tangkai turin mipuite an chah a, a tul dan ang zela pun theih turin police-te pawh an awm reng tih an sawi.