I&PR Minister Lalruatkima’n nimin khan a pisa-ah MJA member te thingpui inpuiin, thu thar thehdarhtuten sorkar an tawiawmnaah leh thlawp thinnaah lawmthu a hrilh.
Lalruatkima hian mihringte chu engtik lai pawha inzir reng tur an nih angin an kal dan chu, ‘a tawk e’ ti ngawt thei an ni lo a. Kum 2023 thar hian eng hmasawnna nge a thlensak ang tih ngaihtuaha rilru thar pu theuh turin a sawm.
Kum hnih ngawt hripui leng avanga ramin harsatna a tawh chhung pawha thu thar thehdarhtuten sorkar an thlawp tlat chu lawmawm a tih thu a sawi.
Mipui thlan tlin sorkar chu sawisel ngam loh a nih a rem lo tih sawiin, “Sawiselna chu sorkar tan inenletna tak tak a ni thei a. Amaherawhchu, sawiselna hi dengkhawng tak tak ni loin, sorkar tan insiam thatna tur atana constructive criticism ni zawk se, insiam thatna tura insawiselna hi mi tute pawhin kan tangkaipui a ni,” a ti.
Department hmalakna leh hmachhawp thenkhatte sawiin Lalruatkima hian journalist pension scheme chungchangah department chuan a tih tur a tifel tawh a, thla hnih thum kalta khan law department-ah theh luh ni tawhin tihpuitlin a nih theih nan theihtawp chhuaha umzui mek zel a nih thu a sawi.
Press Enclave leh thil thenkhatah erawh beisei anga hlawhtlinna a la awm thei lo erawh chu pawi a tih thu a sawi.
I&PR minister hian Mizo tawng hman leh ziah dik chungchangah chanchinbumite chu Mizo tawng humhalhtu leh theh lartu pawimawh tak an nih thu a sawi a. Tun laia thuthar thehdarhna kawnga thiamna tharte hman tangkai a tul tih a sawi a. Social media kaltlanga thu belhchian dawl lo leh thu dik lo vawrh lar a nasat thu sawiin, thuthar thehdarhtute chu mipuite zirtir kawngah theihtawp chhuahpui turin a sawm.
He inkawmnaah hian MJA President C. Lalrambuatsaiha leh member dangte pawhin thu an sawi a. Minister hi H.M.Hualsangi, Secretary, I&PR Department; Betsy Zothanpari, Addl. Secretary; C. Lalnunkima, Director I&PR leh officer dangten an tawiawm a ni.